Sjaan

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Sjaan (Nederlands Scharn) is 'n veurmaolig buurtsjap, noe 'n wiek in 't ooste vaan Mestreech, ten zuie vaan 't Wittevrouweveld en Amie, ten noorde vaan Hier.

Sjaan heet 'n eige parochiekèrk gewiejd aan Antonius van Padua. 't Mergele gebouw stamp oet 1936 en is gebouwd volges planne van A. Swinkels. 't Marmer in de kèrk kump oet Livorno en waor, nao tot bouwpestoer Jos Janssen 'm dat gevraog had, e kado vaan de fascistische dictator Benito Mussolini, dee op dees meneer e wit veutsje bij de kathelieke kèrk perbeerde te hole. Binne steit 'n Binvignatörgel oet 1794.

In de wiek gief 't 'n groet aontal veurzieninge, zoewie winkels en sjaole. Teves vind me hei 't Psycho-Medisch streekcentrum Vijverdal. De Sterflat, es in 't oug springend gebouw, opende in 1972 häör deure. Al vief jaor later erkinde de toenmaolige directeur dat 't gebouw neet voldeeg. Op 14 aprèl 2007 is 't gebouw mèt 75 kilo dynamiet opgebloze um plaots te maake veur nuibouw.

De ierste bebowwing is woersjijnelek oet de Karolingische tied, aon de verbindigsweeg tösse Mestreech en Aoke. Roond 1100 stiechde Adelbert van Sjaan 'n ridderbörg boevaan de fundaminte nog aonwezig mótte zien. Niemes wèt evels boe. In 1145 stiechde de oet Mestreech aofkomstige abt Erpo vaan de Rolducse abdij Kloosterrade 'n vestiging veur zusters bij Sjaan. Daoveur had heer de besjikking euver 'n sjinking vaan Adelbert, nl. 'nen hoof mèt 18 bunder land.

In 1796 woort Sjaan door de Franse bij Hier geveug. D'r waore toen 31 hoezer mèt 216 inwoeners. De annexatie woort in 1920 weer trökgedrejd.

'ne Sjaan is 'ne graafheuvel oet de Romeinsen tied. Ein vaan de graafheuvels laog bij 't kruuspunt Bemelerweeg-Awwe Meuleweeg.

Gemeinte Mestreech
Stad: Mestreech
Veurmaolege dörper: Amie · Hare · Hier · Heugem · Ittere · Lummel · Sjaan · Sint Pieter · Wiek · Wolder
Buurtsjappe en stadswieke: Aajd Kaberg · Annadal · Beatrixhave · Belfort · Belvédère · Biesland · Binnestad · Boschpoort · Bosscherveld · Boschstraotkerteer · Brusselse Poort · Campagne · Daalhof · De Heeg · De Karosseer · De Ravelijn · De Vogelzaank · De Zjeramiek · Dousberg-Haozendans · Eyldergaard · Fróntekerteer · Geusseltpark · Heugemerveld · Hoeve Nekum · Jekerdal · Jekerkerteer · Kaberg · Kestiel Neercanne · Kommelkerteer · Laonekerveld · Malberg · Malpertuis · Mariaberg · Mariënwaard · Meerssenhoven · Nazareth · Potteberg · Randwiek · Sint Maartenspoort · Statekerteer · Villapark · Vroendaal · Wiekerpoort · 't Wittevrouweveld