Nusantara
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Nusantara is 'n stad in aonbouw op 't Indonesisch eiland Borneo (Kalimantan), in de provincie Oos-Borneo. Sinds 17 augustus 2024 is 't de nui hoofstad vaan 't land. Nusantara is gepland um de aw hoofstad Djakarta, wat e hendeg oongezoond klimaot kint en groete greujprobleme heet, te oontlaste. De bouw begós in juli 2022. Volgens de planning zal 't zeker tot 2045 dore ietot 't lèste noe loupend projek veerdeg is.
De naom Nusantara kump oet 't Aajd-Javaons en beteikent lètterlek 'boete-eilen'. 't Is 'nen term oet d'n eid dee Gadja Mada in de veertienden iew aoflag es hierser vaan zoewel Java es väöl gebeed op aander eilen. De naom verwijs zoedoende nao ein vaan de ajdste naome veur d'n Indonesischen arsjipel, zoewie nao de ligking vaan de stad in Borneo (en dus neet op Java).
Al in de koloniaolen tied leep de discussie euver 't verplaotse vaan de hoofstad, mèt es veurnaomste argumint tot 't klimaot in Batavia zoe oongezoond waor. In 1808 leet gouvernäör Daendels daorum al de boetewiek Weltevreden bouwe. In d'n twintegsten iew wouw me de hoofstad verlègke nao Bandoeng, e plan wat in de jaore twinteg good op gaank raakde meh oonderbroke woort door de crisis en d'n oorlog. Wie in 1949 Nederland de oonaofhenkelekheid vaan Indonesië erkós, woort Jakarta wie vaanzelf weer hoofstad, meh de discussie begós al in de jaore viefteg obbenuits. Door de jaore heer heet 't versjèllende planne gegeve. Oetindelek hakde president Joko Widodo in 2017 de knoup door: heer koos 'n plaots aon de kös vaan Borneo es locatie veur de nui hoofstad.
Op 22 fibberwarie 2022, nog ietot de ierste paol in de groond góng, woort de stad Nusanatara bij wèt gestiech. Ze weurt es hoofsteidelek distrik bestuurd door de Otorita Ibu Kota Nusantara, 'nen euverheidsdeens dee direk oonder de president ressorteert. 't Hoof vaan de OIKN heet dezelfde wètteleke status wie 'ne provinciegouverneur. Sinds 2023 is Nusantara verzösterd mèt Astana, de ouch al geplande hoofstad vaan Kazachstan.
Bij de bouw vaan de stad zien noe al groete financieel tegevallers en vertraginge oontstande. Bij de inwijing woorte zörg oetgesproke tot Nusantara jaorelaank es 'n soort spookstad zouw kinne functionere.