Nieuwegein

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Nieuwegein is 'n gemeinte en stad in de Nederlandse provincie Utrei, mèt op 1 juni 2005 61.332 inwoeners. De stad ligk ten zuie vaan de stad Utrei en is in d'n twintegsten iew oontstande es häör veurstad.

De meiste inwuners wèrke neet in de gemeinte zelf, mer in Utrei. Nieuwegein is daodoor e typisch veurbeeld vaan 'n slaopstad. Toch vint me ouch hei wel arbeidsplaotse, zoewel in de deenstesector (Plettenburg, Het Klooster) es in de industriesector (Laagraven).

Niewegein is mèt 'ne sneltram mèt Utrei en IJsselstein verboonde en ligk aon de otosnelweeg A2, A12, en A27.

Allewel tot de stad veurnaomelek oet nuibouw vaan oet de jaore zeveteg (en later) besteit, höbbe de aw dörpskerne väöl vaan hun dörpsgeziechte bewaord. Allebei de kerne strekke ziech oet in lintbebouwing aon de Vaartsche Rijn. Vreeswijk is al sinds de jaore zesteg e besjermp dörpsgeziech;^[1] de gemeinte wèlt ouch vaan Jutphaas e besjermp dörpsgeziech make.^[2] Ouch vint me nog midde tösse de bebouwing 't Kestiel Oudegein trök. 't Stadscentrum, kort nao de fusie gebouwd in brutalistische en rigoureus zakelek-functionele stijl, weurt allewijl ingriepend verbouwd um 't aontrèkkeleker te make.^[3] Nieuwegein ligk aon de Lek en aon daan wel bij versjèllende kenale: de Vaartsche Rijn, 't Merwedekenaal, 't Amsterdam-Rijnkenaal en 't Lekkenaal.

Op de plaots woe noe Niewegein ligk laoge iewelaank twie dörper, Jutphaas en Vreeswijk. Wie vaanaof de jaore zesteg vaan de twintegste iew 'nen trend vaan suburbanisatie, verveursteideleking, op geng kaom, zoch me nao locaties woe me dit perces kós oetveure. De Ierste Nota Ruimdeleke Ordening woort speciaol veur dit beleid gesjreve. Me besloot 't bouwe vaan groete nui wieke in 't Greun Hart tege te hawwe en de veurstei op zeker plekke te concentrere. Oetindelek woorte Jutphaas en Vreeswijk same aongeweze es greujkern veur de stad Utrei (neve 't kortbij Houten); ze zouwe daan in ein gemeinte mote opgoon. Me koos veur de naom Nieuwegein, gebaseerd op de aw stad Gein (Geyn), die in de veertiende iew verweus woort en tösse Jutphaas en Vreeswijk in gelege had. Op 1 juli 1971 waor de fusie e feit.

• Edward van Cuilenburg, tv-prizzentator
• Spinvis, zenger, popmusicus
• Marianne Weber, volkszengeres

1. ↑ Besjermde dörpsgeziechter in Nederland anno 2008
2. ↑ Gemeinte Nieuwegein - Beschermd dorpsgezicht Jutphaas
3. ↑ Historie binnestad Nieuwegein

• http://www.nieuwegein.nl

Provincie Utrech
Amersfoort · Baarn · Bunnik · Bunschoten · De Bilt · De Ronde Venen · Eemnes · Houten · IJsselstein · Leusden · Lopik · Montfoort · Nieuwegein · Oudewater · Renswoude · Rhenen · Soest · Stichtse Vecht · Utrech · Utrechtse Heuvelrug · Veenendaal · Vijfheerenlanden · Wijk bij Duurstede · Woerden · Woudenberg · Zeist
Opgelufde gemeintes