Moldau

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De Moldau (Tsjechisch: Vltava) is mit de 440 kilomaeter de langste reveer in Tsjechië. De reveer óntsteit oet e deil brónreveren in 't Bohemer Waad en mundj oet innen Elbe, naodet t'r de Boheme van 't zuje toet 't naorde doorkruuts haet. De reveer kump ouch door Praag. De naam vanne Moldau is van Germaansen oersprónk en mèntj "wildj water". d'n Duutsje naam Moldau wuuert in Nederlandj nag ummer mieë gebroek es de Tsjechische.

De Moldau óntsteit in 't Bohemer Waad oet e deil bergbaekskes die same twieë brónrevere vörme: de Werme Moldau (Teplá Vltava) enne Kaje Moldau (Studená Vltava). De Werme Moldau is de langste vanne twieë kump op oete bergkantje vanne Černá hora, net nag op Tsjechische gróndj. De brón vanne Kaje Moldau ligk oppe bergkantj vanne 1167 maeter hoeagen Haidel in 't Beiers Waad.

De Wermen enne Kaje Moldau kómme zujelik van Volary (Wallern) biejein, juus veurdet de Moldau oetkump op 't Lipnomaer, de grótste van 'n rits stoewmaere. Dees maere zeen inne fieftiger jaoren aangelag gewore veure waterstandj te regelen en lieëger-gelaenge plaatse te besjurme taengen euverstruiminge.

Euver Český Krumlov (Krumau), České Budějovice (Budweis) en Praag mundj de reveer oet innen Elbe bie Mělník. De Moldau druueg op die plaats mieë water es d'n Elbe zelf. De Moldau is vanaaf zón 20 kilomaeter hogerop van Praag bevaarbaar.