Haren (Groninge)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Haren is e dörp in de de gemeinte Groninge in de Nederlandse provincie met dezelfde naom. 't Dörp ligk tösse de stad Groninge en de grens mèt Drenthe. Haren waor tot 2019 'n zelfstendege gemeinte, boe neve 't dörp Haren ouch de kerne Essen, Glimmen, Harendermolen, Noordlaren, Onnen en Paterswolde (veur e deil) bij hoorte.

Door zien ligking aon d'n Hoondsrögk is de groond vaan Haren al sinds de prehistorie bewoend. Zoe is bij Noordlaren 't eineg Nederlands hunebèd boete Drenthe gevoonde. Ouch oet de Romeinsen tied en de middeliewe zien reste opgegraove. De plaotse oet de gemeinte Haren, toen neet mie es gehuchter, maakde in de middeliewe deil oet vaan 't Gorecht. Dit gebeed kaom in 1040 in lien aon de bisjop vaan Utrei. In 1249 weurt de plaots Haren veur 't iers geneump; ze is evels belaankriek awwer, wat oonder mier bliek oet de kèrk mèt torie vaan roond 't jaor 1200. Haren moot dus toen al 'n plaots vaan eineg belaank zien gewees. Later krijg de stad Groninge hei de mach: in 1392 krijg ze 't Gorecht in pach um 't in 1460 vaan de bisjop te koupe. Haren had in 't verleie e bitteke beteikenis es handelsplaots, mèt e klein havensje aon de Drentse Aa, meh kós dees positie neet vashawwe. In de twintegste iew woort Haren 'n forenzegemeinte veur Groninge. In 2012 trok 't dörp lendelek de aondach door 'project X', 'n oet de hand geloupe fies wat via Facebook woort georganiseerd. 't Evenemint trok neve fiesgengers ouch vandaole aon. Op 1 jannewarie woort de gemeinte Haren opgeluf en, same mèt de ouch opgelufde gemeinte Ten Boer, aon de stad Groninge touwgeveug.

In de categorie Haren, Groningen van Wikimedia Commons zeen media gerelateerd aan dit óngerwerp te vènje