Dzjinn

Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.

Inne dzjinn (Arabisj: جن) is in 't islamitisch vólksgeleuf oet uëverleëveringe va d'r koran 'n boavenetuurlige en sjpirituele entiteit, die op g'ne eëd rónkwaat en minsje kin bezatte. Same mit d'r minsj en de ingele, vörme de dzjinns de drei weëzes deë Allah (God) gesjöp hat. In 't islamitisch vólksgeleuf weëde dzjinns dök geprisenteëd as geister deë winsje va sjtirvelinge kinne vervölle, oeë van 't bekankste verhaal 1001-naach is. Sómwieles zint dzjinns i vólksverhaler óch demonische óf hauf-demonische weëzes, meh 't guëf óch gooj dzjinns deë zich óngerwirpe aa God en dön goddelige take oetvuëre. Dzjinns guëf 't i mieërder versjieninge, en mieëstes köame deze weëzes uëveree mit de trolle, elfe, feeën, nymfen en anger natuurweëzes die me in Europa kint. E wichtig versjil mit dees mythologische weëzes van 't westerse vólksgeleuf, zint dön ónsjtoffeligheed, wie bei geister. Óch shaitan (Satan) weëd as dzjinn gezieë, meh zing intentie is ummer sjlech. Vólges de koran hat heë d'r val van Adam en Eva veroerzakd.