Carl Philipp Emanuel Bach
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
| Carl Philipp Emanuel Bach | |||
| |||
| Gebore | 8 miert 1714 | ||
| Gesjtorve | 14 december 1788 | ||
| Landj | Duitsland: Sakse-Weimar, Pruses, Vrij Stad Hamburg | ||
| Sjtielperiood | rococo, klassiek | ||
| Belankrieke genres | klaveermeziek, symfonie, klaveerconcert, kèrkmeziek | ||
| Invlood van | Johann Sebastian Bach, Johann Georg Benda | ||
| Invlood op | klassieke meisters, i.'t.b. Joseph Haydn | ||
| Lies van componiste | |||
Carl Philipp Emanuel Bach (Weimar, 8 miert 1714 - Hamburg 14 december 1788) waor 'nen Duitse componis. Zie werk vèlt oonder de rococo daan wel (pre-)klassiek, in 't bezunder oonder d'n empfindsame ('sentimentele') stijl. Gebore es twiede zoon vaan Johann Sebastian Bach en dee zien ierste vrouw Maria Barbara kraog heer de meziek vaan joonks aof aon mèt. Volwasse gewore góng heer in deens bij de meziekleefhöbbende keuning Frederik de Groete in Potsdam. Dao componeerde heer oonder mie orkesmeziek en veural väöl klaveermeziek. Vaanaof 1768 woende en wèrkde heer in Hamburg, es opvolger vaan Georg Philipp Telemann, en góng heer ouch lutheraanse kèrkmeziek sjrieve. Ziene meziek versjèlde vaan de mieste aander componiste oet deen tied door 't väölvöldeg gebruuk vaan oonverwachde tempowisselinge, oonverwachde modulaties, depe chromatiek en rieke hermenieë, alles um de grèllegheid vaan de minseleke natuur getrouw te sjèldere. Mèt deze meziek maakde heer ziech geleef bij meziekleefhöbbers, neet in 't minste aander componiste. Oonder mie Joseph Haydn góng bij Bach in de lier. Ouch es klaveerlierer maakden 'r naom; zie book Versuch über die wahre Art, das Clavier zu spielen is nog ummer vaan groet belaank veur 't meziekwetensjappelek oonderzeuk.
