Sosiobiolojia

De cuando Darwin ia introdui sua teoria de evolui, persones - incluinte Darwin mesma - ia divina sur nosa conduis sosial (e emosias, disposas, etc) e como los pote es afetada par evolui. Serta, si la modo en cual nosa corpos aspeta e opera como viventes pote es plu bon comprendeda par usa la ideas de evolui, perce no la cosas cual nos fa con esta corpos?

La entomolojiste E. O. Wilson ia es la prima ci ia presenta formal la idea ce condui sosial pote es esplicada con evolui, e el ia nomi sua teorias sosiobiolojia. A prima, lo ia gania la interesa sola de biolojistes - e an los inclui criticores forte. Cuando sosiolojistes e psicolojistes ia deveni familiar con lo, la controversia ia comensa seria. A acel tempo, sosiolojia ia es, per la plu parte, strutural-funsional, con alga marxistes e femistes. Psicolojia ia es ancora dominada par la teorias de aprende conduiste, con umanisme comensante. No un de esta teorias ave multe spasio per la idea ce nos, como umanas, pote es tan forte determinada par la biolojia de evolui.

Tra tempo, la sosiobiolojia de Wilson ia trova plu e plu suportores entre biolojistes, psicolojistes, e an antropolojistes. Sola sosiolojia ia resta relativa nonafetada.

Nos pote comensa con un esemplo de condui instintosa en animales: la Gasterosteus aculeatus, plu bon conoseda como la spinosa. Lo es un pex de sirca 2.5 cm cual on pote trova en la rios e lagos de Europa. La primavera es, como on pote espeta, la saison de cortea per la spinosa, e un tempo perfeta per vide alga de sua instintos.

Alga cambias aveni en sua aspetas: La mas, normal blanda, deveni roja supra la media. El crea un teritorio per se mesma, de cual el ta xasa cualce mas con colores simil, e construi un nido par sperde malerbas en un caveta e alora corsa tra los repetente per crea un tunel. Esta conduis es tota inata. Mases ci ia crese solitar fa la mesma. Nos vide, en fato, ce la mas ta, en la saison de cortea, atenta xasa otra mases de sua teritorio, e an e otra cosas, incluinte la refleta en la vitro de la acueria de camiones roja pasante.

La fema cambia ance: Normal blanda como la mas, el deveni inflada par sua multe ovos e developa un brilia arjentin cual, lo pare, no spinosa mas pote resiste. Cuando la mas vide la fema, el va nada en la dirije de la fema en un modo zigzaga. La fema responde alora par nada a la mas con sua testa levada. La mas responde par nada rapida a sua nido, mostrante la entra. La fema entra la nido, con sua testa estende estra un lado de la nido, e sua coda estra la otra lado. La mas responde par puia ritmal a la funda de la coda de la fema. El relasa sua ovos e sorti de la nido. La mas entra e fertili la ovos, e alora (un sesiste a la cor) xasa la fema a via, e comensa espeta un fema nova.

Cual on vide operante asi es un serie de stimulas sinial e atas fisada: La dansa zigzaga es un responde a la aseta de la fema, cual deveni un stimula per la fema per responde, etc. Posible esta es un salta tro longa, ma esce esta no remente on de la cortea de nosa rituos de cortea como umanas? Serta, lo no es tan automata, ma la conduis cuasi fisada pote forma un funda per nosa conduis plu complicada e aprendeda.

Etolojistes - siensistes ci studia la condui de animales en situas natural - ia studia conduis como los de la spinosa per plu ca un sentenio. Un, Konrad Lorenz, ia developa un model idraulica de instintos. Nos ave un cuantia de enerjia dedicada a un sistem spesifada de instinto, como un reserva de acua. On ave un aparato neurolojial cual permete la relasa de alga o tota de acel enerjia cuando un stimula sinial apare - un valva. On ave plu aparatos - neurolojial, motor, ormonal - cual tradui la enerjia a respondes fisada. Oji, nos pote sujesta otra metafores plu bon e tradui la sistem a un model informatica. Ma la descrive ancora sona bon.

On ave du campos de condui, estra seso, cual pote es posible jeneralida a umanas:

1. Alga modos de condui trovada en la plu spesies de animales, cual envolve la proteje e promove de se mesma, la xerca per prestijia o potia, esemplida plu bon par atas agresiva. On pote nomi esta la instinto agresiva.

3. Otra modos de condui trovada en multe spesias, envolve la cura de algun otra ce se mesma, esemplida en la cura par un madre per sua enfantes. On pote nomi esta la instinto nurinte.

La fundas de evolui es simple: Prima, tota animales tende per reprodui plu ca nesesada, algas con miles de projenia en un vive. Ma la poplas de animales tende resta multe stable tra la jeneras. Clar, alga de esta projenia no es survivente (o reproduinte).

Du, on ave alga varia entre cualce spesie. Multe de la varia es fundida sur jenetica e es pasada de un jeneral a la seguente. Incluida en acel varia es cualias cual aida alga individuas per survive e reprodui, e otra cualias cual nonvantaje los.

Combina la du ideas, e tu ave eleje natural: Natur coraji la reprodui de la cualias positiva e descoraji la reprodui de la cualias negativa. Tan durante ce la varia continua es creada par recombina sesal e muta, e la recursos per vive resta limitada, evolui va continua.

Un sosiobiolojiste, David Barash, ia sujesta un demanda gidante per comprende la radises posible de cualce evolui de condui: "Perce zucar es dulse?" cual es per dise, perce nos trova lo atraente? Un ipotese es ce nosa asendentes ia come frutas per sasia sua nesesas de nuri. Fruta es la plu nurinte cuando matur Cuando fruta es matur, lo es plenida con zucar. Cualce asendente ci ia prefere la sabor de zucar ta es alga plu probable per come la fruta matur. Sua bon sania resultante ta causa ce el deveni plu forte e plu atraente a posible sposes. El pote produi enfantes ci ia erita sua gusta per fruta ta es plu probable per survive a un eda per reprodui, etc. Un forma plu jeneral de la demanda: "Como pote acel condui aida la survive e reprodui?"

Un nota curiosa sur la esemplo: Oji, nos ave zucar refinada, alga cosa no otenable per nosa asendentes. Lo es clar ce un atrae a zucar no plu servi nosa survive e reprodui. En loca, nos deveni plu lente e debil, e min atraente a sposes posible. Ma cultur aveni multe plu rapida ca evolui: Lo ia nesesa miliones de anios per evolui nosa gusta sana per zucar; lo ia nesesa sola miles de anios per suverti lo.

Nos pote comensa par regarda la eleje de otras per copula. Lo es clar ce nos es atraeda a alga persona plu ca a otras. Sosiobiolojistes ave la mesma esplica per esta como los ave per otra casos, fundida sur la demanda fundal: Nos debe es atraeda a otras de ci sua cualias ta masimi nosa susede jenetical, per dise, cualias cual dona multe enfantes ci es sana, ta vive longa, e es fertil.

Nos debe trova sania atraosa e, conversa, maladia nonatraosa. Nos debe trova un aspeta "perfeta" como atraosa, e malformidas nonatraosa. Nos debe trova vivosia, fortia, ativia atraosa, e no pigria, debilia, e torpia. Nos debe trova la "promedia" atraosa - no tro corta e no tro alta, no tro spesa e no tro magra, etc. Quasimodo, an si el ia es un bon om, ta ave difisilias en atrae un spos.

Nos es ance atraeda a alga persones per razonas min "lojical", como la grado a cual los ave cualias forte mas o fema - cualias fisical e de condui. Femes prefere jeneral omes ci es plu alta, con spalas larga, un fas plu longa, musculos (ma no tro), etc. Omes prefere femas ci es plu corta ce se mesma, plu ronda (ma no tro), plu mol, plu joven, etc.

Esta diferes entre la sesos es nomida dimorfe sesal, e la prosede cual condui a esta diferes es nomida eleje sesal. Diferes peti e funsional entre la sesos pote deveni diferes grande e nonfunsional tra multe jeneras. Si avias fema es instintosa atraeda a mases colorosa - posible car mases colorosa ia servi per distrae predores de femas ensinta e sua avietas - alora un mas ci es plu colorosa ta erita sua colores va ave un probablia plu bon, e la fema con un atrae plu forte a omes colorosa va ave un probablia plu bon, e sua enfantes ci ia ave la colores o la atrae, etc. Esta pote continua asta la colores e la atraes no es plu un benefica ma un descapasia, como un de la avias de paradiso. Alga mases no pote an vola su la pesa de sua plumas!

Umanas es sola un poca dimorfe. Ma nos es serta consensa de la dimorfes!

Femas tende es plu esijente sur con ci los ta copula. Los es plu sensosa a indicas ce un mas spesifada va contribui a sua susede jenetical. Un esemplos clar es la atende de multe animales fema a la grandia e fortia de mases, e la developa de contestos spesialida, como la batalias de animales con cornos, per mostra lo.

On ave alga cosas min clar ance. En alga animales, mases debe mostra, no sola fortia, ma la capasia per furni comedas. Esta es spesial vera en cualce spesies cual ave la mas furni comedas per la fema en sua ensintia e developa temprana de la enfantes - como umanas! Sosiobiolojiste ia sujesta ce, cuando omes es atraeda a jovenia e la forma fisical de un fem como importante, femes tende xerca per indicas de susede. Los nota ce, en multe sosias, la om tende dona cosas a la fem, e femes espeta esta. Lo es serta la resulta de cultur e eleva, ma posible lo ave instintos a la funda.

Plu, los sujesta, femes pote trova ce los es plu interesada en la om "matur", car el ia demostra ja sua grado de susede, e min interesada en la om "nonmatur", ci representa un risca. Sola femes multe joven prefere la "xico mal", con sua condui riscosa. E femes aseta, en multe cultures, la esiste de otra femes en la vive de un om, como la esiste de polijinia, concubinas, etc. Comparti un om susedosa es plu bon en alga casos ca ave un fali intera per se mesma. Nota ce polijinia es plu comun ca monogamia (en cuantia de cultures), ma poliandria (un fem con plu ca un sposo) es trovada en posible du cultures (un en Tibet e un en Africa), e en ambos casos, lo envolve du frates "comparti" un fem per no rompe la proprias eritada e multe peti.

De la otra dirije, omes no tolera jeneral la nonfida ca femas. Femas "sabe" ce sua enfantes es vera sua enfantes; omes sabe nunca serta. Jenetical, lo no es tan importante si omes ave multe "esperia" (pd ia copula con multe femes). E, serta, la plu de cultures es multe plu sever con femes ca omes regardante adultera. E en la plu de cultures, la fem move per abita con la familia de sua sposo - posible per manteni un oia sur la venis e vades de la fem.

De la perspetiva de nosa cultur sur ama e sposi, lo es interesante per nota ce en la plu de cultures, un fali per copula en un sposi es un funda per divorsa o nega de la sposi. En nosa cultur, cosas de nonfertilia o nonpotentia es comun causas de divorsa. Lo pare ce reprodui es plu importante ca nos prefere aseta.

Natural, on ave un limita a la estende a cual nos pote jenerali de animales a umanas (o an de cualce spesies a un otra), e esta es spesial vera regardante seso. Umanas es un animal multe sesosa: La plu de animales restrinje sua ativia sesal a periodos definida, ma nos ave seso la mense intera e sirca la anio. Nos no sabe perce. Posible, lo es un resulta de la fato ce nosa enfantes es tan debil e sin defende per un tempo longa. Posible esta es un modo per manteni la lias familial: developa la posible de seso continuante, incluinte la orgasma fema, cual serta teni la om en sua propre casa.

Nos tende es atraeda a nosa enfantes, e los tende es atraeda a nos. Adultes de multe spesies tende trova representas peti de sua spesias, con sua brasos e gamas corta, testas grande, fases plata, e oios grande e ronda adorable - "dulse", como la sosiobiolojistes ta dise. Lo es multe razonable per evolui ce, en animales con enfantes relativa debil, la adultes es atraeda a sua enfantes.

La enfantes pare es atraeda a alga cosas ance. Gansetas, como cadun conose, deveni liada a la ojeto grande e movente prima ce los encontra en la du dias prima de sua vive - plu comun madre ganso (e a veses Konrad Lorenz o otra etolojistes). Esta es nomida "impresa". Enfantes umana responde a duples de oios, voses fema, e toca suave.

La gansetas responde a sua stimula sinial con la responde de segue, leteral seguente acel ojeto grande e movente. Enfantes umana, natural, no es capas de segue, donce los adota un engana: la rieta vasta, plen, sin dentes cual jenitores trova inondante atraosa.

Sosiobiolojistes ance predise ce madres ta atende a sua enfantes plu ca padres, car los ave plu investida en los, e es plu serta ce los es la madre de esta enfante. Los predise ce madres plu vea ta atende plu ca madres joven, car los ave min oportunes per plu reprodui. Lo predise ce nos tende dona plu conserna a nosa enfantes cuando nos ave sola poca enfantes ca cuando nos ave multe. Los predise ce nos ta crese nosa conserna per nosa enfantes cuando los es plu vea, car los ia demostra sua capasia per survive. E los predise ce nos ta tende puia nosa enfantes a sposi e ave enfantes, car vole garantia la survive de sua jenom per plu ca sola un o du jeneras. Clar, an si otra siensistes insiste ce sosiobiolojia no pote es un siensa, la sosiobiolojistes ia introdui ipoteses derivada de la teoria, e ia trova metodos per suporta los con oservas.

Aida, cura, compati, etc, es plu comun cuando lo envolve nosa enfantes, jenitores, sposes, o otra relatas o amis prosima. Los es min e min probable cuando lo envolve cusines o visinas nonrelatada o distante. Lo es tan noncomun cuando lo envolve stranjeres o popla de otra cultures e razas ce nos recorda un nara - "la bon samaritan" - cuasi 2000 anios pos la orijinal.

Sosiobiolojistes predise ce aida descrese con la distantia de relata familial. En fato, lo debe aveni sola cuando la sacrifia es min pesosa ca la vantaje ce la sacrifia furni per la jenes tu comparti con esta relatas. La jeneticiste J. B. S. Haldane ia dise "me ta dona felis mea vive per 3 de mea frates, 5 de mea sobrines, 9 de mea cusinas, etc". Esta es nomida eleje de relatas. Lo es altruisme fundida sur egoisme jenetical.

Un tipo de condui aidante es la manada. Alga animales pare desira es prosima, e en situas perilosa an plu prosima, a otras. Lo ave razona: Par colie en un manada, lo es min probable ce tu, como un individua, ta es atacada par un predor. Serta, a veses on pote trova se estra la manada, ma la probablias es bon ce la ves seguente, tu va es nidin a la interna.

Un otra tipo es nomida altruisme resiproca. Un can-de-prado ci vide un predor va comensa cria forte, per esemplo. Esta averti la resta de sua comunia, an si lo trae la atende de la predor a se mesma, la un ci cria.

La manada e aida resiproca susede per la mesma razona ce eleje de relatas susede: Los contribui a un susede incluinte: Un peti redui de la probablias de me propre survive es plu ca ecuilibrada par la survive de relatas cuasi prosima. Alga animales an aida cualce membro de sua spesies, con la "comprende" instintosa ce on pote es la beneficada a la ves seguente.

Robert Trivers ia sujesta ce umanas partisipa en un forma plu sofisticada de aida resiproca, compartida con poca otra viventes avansada. On ta es volente per sacrifia per un otra person si lo es comprendeda ce acel otra person spesifada ta fa la mesma per tu, o resiproca en alga otra modo, "esta per acel". Clar, esta nesesa ce on ave la capasia per reconose individuas e per recorda detas (e per onora esta detas)!

Otra jeneticistes ia sujesta ce, si on ave un funda jenetica per aida resiproca, on ta ave ance alga individuas cual froda par permete ce otras aida los sin onora sua propre obligas. En fato, dependente de la vantajes cual altruisme resiproca furni on, e la tende de altruistes per ataca frodores, frodores va es trovada en cualce popla. Otra studias ia mostra ce "sosiopatia" - la iniora de mores sin senti culpable, es trovada en un parte sinifiante de la popla umana.

On ave, serta, no nesesa ce un person es 100% altruiste o 100% frodor. La plu de nos (o posible tota de nos), an si nos deveni coler a frodores, es vera capas de froda cuando la nesesa aveni. Nos senti culpable, ma nos pote froda. Un parte grande de la mente de umanas par es donada a la calcula de nosa probablias de susede o fali a tal manobras nononesta. Un idea simil es la "analise de custas e beneficas" de economistes.

Como multe consetas en psicolojia sosial, agresivia ave multe definis, e multe evaluas. Algas pensa de agresivia como un virtua grande (per esemplo, la comersior agresiva), e otras vide agresivia como un sintom de un maladia mental.

La fato ce nos reteni la mesma parola per ambos sujesta ce on ave un comparti: Agresivia positiva e negativa ambos servi per avansa la ego. La varia positiva, cual nos pote nomi autofida o sertia, es condui se en un modo cual boni la ego, sin la implica ce nos debe feri un otra. La varia negativa, cual nos pote nomi viole o combatosia, foca plu sur la mali de otras como un modo de boni se mesma.

An si la vive de animales pare frecuente alga sanguosa, nos debe nota ce preda - la xasa e mata de otra animales per come - no es la mesma como agresivia. Preda en spesies carnivor es plu como come a pasto en spesies vejetaliste ca violente entre membros de la mesma spesie. Regarda la gato en tua visineria, xasante un mus: El es composada e fria, no loco e calda. En termas umana, la xasa no ave la corelata emosial de coler cual on vide en viole. La gato es sola condui sua comersia.

Sin estas, on ave vera poca agresivia en la mundo de animales. Ma lo resta: Nos trova lo plu comun en situas de compete sur un recurso. Esta recurso debe es importante per sua survive e reprodui, e restrinjeda en cuantia. Animales no compete per aira, ma pote compete per acua, comedas, locas per nidos, e sposes.

Lo es la compete per sposes cual es la plu importante per agresivia en mamales. E lo es la mases cual es la plu notada per esta. Como diseda plu temprana, femas ave tan multe investida en cualce ata de copula - tan multe menses de ensinta, la nesesa per plu nuri, la difisiles de pari, la abri a ataca, la carga de leti - ce lo servi sua survive e reprodui per es plu esijente cuando xercante per un spos. Si femas es esijente, mases debe es ostentante: La mas debe demostra ce el ave la cualias cual servi la survive e reprodui de la fema, per secur sua propre survive e reprodui. Servos es un bon esemplo. Nota ce esta no nesesa es consensa o aprendeda; probable, esta es multe instintosa en la plu de mamales. Lo pote ance ave alga fundas instintosa en nos.

Alga de la agresivia de la om pote es esplicada par testosterona, la ormon "mas" (nota ce femas ave lo ance, ma multe min). Injeta testosterona en muses fema, e la limina per condui agresiva deveni plu basa. Sutra testosterona de muses mas (par castra la povres) e sua limina alti. Ma nota ce testosterona no causa agresivia, lo sola basi la limina per lo.

Ma femas en multe spesies pote es multe agresiva (pe cavias), el femas en cualce spesie pote es estrema agresiva en alga situas (como cuando fasante un menasa a sua enfantes). En sosias umana, la statisticas sosiolojial es clar: la plu de crimines violente es fada par omes. Ma nos ia nota ja ce, pos cuando femes susede gania sua diretos per partisipa plen en la mundo sosial e economial, la statisticas cambia, sujestente ce a min un parte de agresivia es aprendeda.

An tal, mases partisipa en un cuantia grande de culpa la testas. Ma on debe nota ce esta competes "per" femes (nota ce, en realia, la femes eleje la mas; la mas no prende la fema!) no tipal fini en moria o an feri seria en la plu de spesies. Esta es car esta competes es esata acel: competes. Los es un caso de mostra de virtuas e tipal inclui atas cual servi como stimulas sinial a la oposor ce la compete es finida: siniales de sede. Combate continuante es de poca vantaje per o la vinsor o la vinseda. An crotales no morde lunlotra.

(Nota ce, en realia, la femes eleje la mas; la mas no prende la fema! La tradisiones en multe cultures de "fura" o an viole un sposa es un condui aprendeda, no instintal. Nos ave inventada un colie grande de "escusas" per viole sesal, incluinte la razona bizara ce femas gusta lo! A la plu, alga femes gusta un om forte, posible per proteje el de otra omes en nosa mundo umana desjunta de la lojica de instintos.)

La posese de teritorio e la ierarcias de domina - pensada en la pasada como focas major de condui agresiva, par es relativa min sinifiante. Animales tende respeta declaras de teritorio e domina, min ca disputa los. Lo es sola cuando la situa, o natural o artifis, es estra la normal, ce nos vide multe agresiva. E la asentia de sufisinte comedas no es la causa de multe agresivia. Southwick, en sua studias de macacas resus en la Zo de London, ia trova ce redui la cuantia de comedas par 25% ia ave no efeto sur la cuantia de condui agresiva, e redui la cuantia par 50% ia descrese lo! Nos trova la mesma entre persones de tribus "primitiva", ma no tan multe pos "sivilia" - un mundo aprendeda alga miles de anios pasada.

Perce nos vide tan multe condui agresiva en umanas? Un posible es ce nos ave tan multe restrinjes biolojial. Sosiobiolojistes sujesta ce animales cual no es bon furnida per combate ave min siniales de sede. Umanas, los sujesta, es un de esta animales. Ma nos ia developa tecnolojia, incluinte la tecnolojia de destrui, e esta tecnolojia ia "evolui" multe tro rapida per nosa evolui biolojial per furni nos con restrinje compensante. Esperia mostra a nos ce fusiles es plu perilosa ca coteles (contra la insista par amores de fusiles), an si ambos es aparatos efetosa per mata, car un fusil es plu rapida e furni min tempo per reconsidera nosa atas razonante (la sola restrinje cual resta per nos).

Un otra problem es ce nosa vive, no sola en la mundo "real", ma en un mundo simbolin ance. Un leon deveni agresiva sur alga cosa asi e aora. Persones deveni agresiva sur cosas cual ia aveni en la pasada distante, cosas cual los pensa va aveni alga dia en la futur, cosas cual nos ia es oia de otras. Un leon deveni coler sur cosas multe fisical; si on maldise el, lo no ta irita el.

Un leon deveni coler sur alga cosa cual aveni a el personal. Nos deveni coler sur cosas cual aveni a nosa autos, nosa casas, nosa comunias, nosa nasiones, nosa instituis relijiosa, etc. Nosa ia estende nosa "egos" distante de nos e nosa amadas a multe cosas simbolin. La responde a la arde de un bandera es un esemplo: Lo es un peso de stofa, no plu; perce la coler?

En animales como la pex peti, la spinosa, on vide un stimula per condui agresiva, pe la ariva de un otra mas roja. Ma si on vade a retro a la idea de compete como un funda de agresivia, on pote nota ce frustra ta es un bon posible. On ave du persones ci desira la mesma cosa: Si un saisi lo, la otra no ave lo e es triste; donce, el saisi lo, e alora la otra es triste, etc (un jua de soma de zero). Un condui dirijeda a un gol ia es blocida, e acel es frustrante.

Varia sur esta tema es multe: Nos pote es frustrada cuando un condui continuante es interompeda (pe, tropeza algun); nos pote es frustrada par un retarda de ateni un gol (move ante algun cuando en un linia a la mercato); o nos pote es frustrada par la disturba de abituas (bevi la copa final de cafe e regarda la reata de otra amores de cafe). Nos es viventes flexable.

Ma nos debe es gardante asi: Otra cosas pote condui nos a condui agresiva esta frustra (como boxores ci es paiada per combate - o esce esta no un esemplo de agresivia?) e frustra pote condui nos a cosas estra agresivia (como un senti de nonpotente sosial comun resulta en depresa).

Multe psicolojistes, sosiolojistes, antropolojistes, e otra es gardada de la esplicas - tan convinsente como los pote es - de la sosiobiolojistes: Per cada esplica sosiobiolojial, no pote trova un esplica cultural. Pos tota, cultur opera par la mesma prinsipes como evolui: On ave multe modos diferente per fa un taxe, ma en la contesto de un ambiente fisical spesifada e un cultur spesifada, alga modos de fa cosas opera plu bon ca otras. Estas es plu probable capas de es pasada de un jenera a a seguente, esta ves par aprende.

Cultures nesesa fa alga cosa si los desira survive. Los debe usa la recursos natural efetosa, per esemplo, cual pote envolve la aprende de multe tipos de conduis teritorial e agresiva, simil a los en la esplicas sosiobiolojial. E los debe serti un grado de coopera, cual pote envolve la aprende de conduis altruiste, regulas per comparti recursos e per otra relatas sosial, como en la esplicas sosiobiolojial. E los debe serti ce la popla continua, cual pote envolve alga ordinas de cortea e sposi, conduis de nuri, etc, como en esplicas sosiobiolojial.

Si un sosia vole survive - e cualce sosia esistente ia survive asta aora - lo debe solve a la mesma problemes cual jenetica debe solve. E, car aprende es multe plu flexable e rapida ca ajusta par evolui, nos debe depende sur aprende per solve problemes si evolui no ia solve los. Ma nota ce la avansa de sosia pote condui nos a estingui.

Alora, esce nos ave instintos? Si instintos es definida como lias automata, como reflexes, probable no. Ma si nos defini instintos como "tendes forte e inata a alga conduis en alga situas", si, no probable ave los. La punto importante es ce nos (diferente de otra animales) pote dise "no" a nosa conduis instintosa, en la mesma modo ce nos debe dise "no" a nosa conduis aprendeda.