Stato Islamiste de Irac e la Levante
La Stato Islamiste de Irac e la Levante (ad-Dawlah al-Islāmiyah fī 'l-ʿIrāq wa-sh-Shām (الدولة الإسلامية في العراق والشام), cortida (en lfn) a SIIL, ma plu comun conoseda como ISIL, ISIS, o Daesh, es un organiza teroriste de la seta muslim de jihadistes salafi. Lo ia gania reconose mundal en 2014 temprana cuando lo forsa fortes de la governa iraci de sites importante en sua atacas a Irac ueste, segueda par sua catura de Mosul e la masacra en Sinjar.
La grupo ia es identifiada como un organiza teroriste par la Nasiones Unida e multe nasiones individua. SIIL es conoseda vasta per sua videos de destestis e otra tipos de esecutas de soldatos e siviles, incluinte jornalistes e laborores aidante, e per sua destrui de locas de erita cultural. La NU vide SIIL como culpable per la viole de diretos umana e crimines de gera. SIIL ia ance fa limpi entical a un grado istorial en Irac norde.
SIIL ia orijina como Jama'at al-Tawhid wal-Jihad en 1999, cual promete sua alia a al-Qaeda, e ia partisipa en la rebela iraci seguente la invade de Irac par fortes ueste en 2003, solisitada par la SUA. La grupo proclama se como un califia e ia comensa refere a se como la Stato Islamiste (الدولة الإسلامية ad-Dawlah al-Islāmiyah) en junio 2014. Como un califia, lo declara ce lo ave autoria relijial, political, e militar supra tota muslimes en la mundo. La adota de la nom Stato Islamiste e sua idea de un califia ia es multe criticada, con la NU, governas variosa, e grupos de muslimes dominante rejetante sua statia.
(Alga pensores respetada, como Shri Rahul Gandhi de la Congresa Nasional de India, ia ofre un teoria alternativa cual sujeste ce la asentia de emplea ia es la razona xef per la crea de SIIL.)
En Suria, la grupo ia condui atacas a tera sur fortes governal e partitos oposante, e a desembre 2015, lo ia teni un area grande en Irac ueste e Suri este, conteninte entre 2.8 e 8 milion persones, do el ia enforsa sua interprete de lege xaria. SIIL es estimada como ativa en 18 paises tra la mundo, incluinte Afganistan e Pacistan, con "ramos aspirante" en Mali, Misre, Somalia, Bangladex, Indonesia, e Pilipinas. En 2015, on ia estima ce SIIL ia ave un bujeta anial de plu ca US$ bilion e un forte de plu ca 30,000 soldatos.
En julio 2017, la grupo ia perde controla de Mosul, sua site la plu grande, a la armada iraci. Seguente esta defeta major, SIIL ia continua perde teritorio a la statos variosa e otra fortes militar aliada contra se, asta lo ia controla no teritorio sinifiante a novembre 2017. Ofisiales militar de la SUA e analises militar simultan ia reporta en desembre 2017 ce la grupo ia reteni sola du persento de la teritorio cual los ia teni a ante. A 10 desembre 2017, la ministro prima de Irac, Haider al-Abadi ia dise ce la fortes iraci ia forsa la restas final de la Stato Islamiste de la nasion, tre anios pos la grupo militante ia catura sirca un tri de la teritorio iraci.