Catarisme

Catarisme, de la elinica καθαροί, "la pur", ia es un promove relijiosa cual pote es interpretada como un dualisme cristian o un revive de gnostica. Los mesma refere a se como Bons Hommes ("bon omes") e Bonnes Femmes ("bon femes"). Lo ia flori en alga areas de Europa sude, spesial en cual es aora Italia norde e Frans sude, entre la sentenios 12 e 14. La Catares (o Cataristes) ia sufri su un periodo longa de persegue par la Eglesa Catolica, cual no ia reconose la credes de la catares como cristian.

Catarisme ia apare en la rejion de Languedoc de Frans en la sentenio 11 cuando la nom apare prima. La aderentes ia es ance nomida "albigensianes", de la site Albi en Frans sude do la promove ia es prima notada en la area. La sistem de credes ia orijina posible en Persia o en la Impero Bizantian. Lo ia es ensiniada inisial par xefes asetica ci dona poca regulas jeneral, afin alga credes e praticas catariste ia varia tra tempo e rejiones. La Eglesa Catolica ia denunsia la particas, incluinte la rituo de consolamentum ("consola"), par cual catares ia es batizada e levada a la state de "perfeta".

La idea de du dios o du prinsipes, un bon e la otra ma, ia es sentral a la credes de la catares. Esta no acorda con la monoteisme de la Eglesa Catolica. Catares ia crede ce la dio bon ia es la dio de la Atesta Nova e la creor de la rena spirital. Los ia crede ce la dio mal ia es la dio de la Atesta Vea, la creor de la mundo fisical, cual multe catares identifia como Iaue o Satan. Catares ia crede ce spiritos umana ia es la spiritos de anjeles trapida en la rena material de la dio mal, destinada per es reincarnida asta ce los ateni salva tra la consolamentum, cuando los pote reveni a la dio bon.

De la comensa de sua rena, Pape Inosente 3 ia atenta fini catarisme par envia misionores e par convinse la autorias loca per ata contra los. En 1208, la delegada papal, Pierre de Castelnau, ia es matada en cuando el reveni a Roma pos esclui Conte Raimond 6 de Toulouse, ci, en sua mente, ia es tro pardonosa a la catares. Inosente alora ia abandona la eleje de envia misionores e judores catolica, ia declara ce de Castelnau ia es un martir, e inisia la Crusada Albigensian cual ia elimina cuasi tota catares.

La orijinas de la credes de la catares no es clar, ma la plu de teorias acorda ce los deveni de la Impero Bizantian, xef par la vias de comersia, e ia sperde de la Impero Balgarsce 1 a Nederland. La nom de balgarsces — bougres — ia es ance aplicada a la Albigensianes, e los ia manteni un asosia con la promove simil de cristianes de la bogomiles ("amis de dio") de Tracia. La prinsipes de la catares ave multe similes con la bogomiles, la paulicianes e marcionites cual ia influe los, la manistes, e gnosticas cristian de la sentenios prima ec.

La catares esplica la problem de malia par declara ce la potia de bon de la bon dio es limitada par la labora de la dio mal, e en reversa. Tota materia vidable, incluinte la corpo umana, ia es creada par esta dio mal; donce, materia ia es manxada par peca. Par esta vista, umanas ia es vera anjeles seduida par Satan ante un gera en sielo contra la armada de Micael, pos cual los ta es forsada per spende un eternia trapida en la rena material de la dio mal. La catares i crede ce, per regania la state anjelin, on debe renunsia sua identia material completa. Asta on ia es preparada per fada esta, on ta es fisada en un sicle de reincarne, condenada per vive sur un tera malida. Sua ideas de renase es simil a los de la budistes.

Catares ia onora Jesus Cristo e segueda cual los videda como sua instruis vera, nominte se como "bon cristianes". La catares ia nega la incarne de Jesus. Posible, los vide Jesus como un anjel en la forma de un umana, de ci la corpo fisical ia es sola un apare. Esta forma iludente ta es donada par [[Maria (madre de Jesus), un otra anjel en la forma de un umana. Los no ia aseta la idea de la trinia.

Los ia rejeta forte la idea de la revive de Jesus, car revive es no plu ca sua idea cual aplicable a cadun. Los ia rejeta ance la simbol de la crus, vidente lo como no plu ca un strumento material de tortura e malia. Los ia vide ance ce Joan la Batiste, identifiada con Elija, como un esente mal, enviada per para la mesaje de Jesus tra la rituo falsa de batiza, en cual la catares no ia partisipa.

Jeneral, la catares ia oposa la tradisiones santa de la Eglesa, vidente los como un parte de la mali moral, spirital, e political de la Eglesa. En contrasta, los crede sola en la rituo corta per sutrae tota pecas de la credor e indui el en la nivel plu alta de un perfeta. Los ance refusa la rituo santa de la eucaristia, disente ce lo no pote es la corpo de Cristo car Cristo no es material.

Multe credores ta reseta la rituo de consola cuando prosimi mori, posible per evita un dura longa de asteni, simil a la pratica de batiza a la leto de mori en cristianisme temprana. Los cual reseta la rituo santa de la consola cuando los es ja morinte, comun para tota come o bevi, e esposa se a fria estrema, per mori plu rapida. Esta ia es nomida "la dura".

Mata ia es repulsante a la catares, e donce la asteni de tota comedas de animales (a veses, con la eseta de pex) ia es espetada de la perfetas. La perfetas ia evita come cualce cosa cual pote es videda como un suprodui de reprodui sesal. Gera e puni par mata ia es ance condenada - un idea multe nonormal en Europa medieval. En un mundo do poca pote leje, sua rejeta de jura marca los como parias sosial. Per la catares, reprodui ia es un malia moral, car lo ta continua la cadena de reincarne e sufri en la mundo material.

Nota ce la enemis de la catares ia sujesta ce, car la catares no reprodui, los partisipa en sodomia per sua sasia. La nom bougre (de "balgarsce") ia continua, ultima en la parola de jergo engles "bugger" per sodomia.

Catares ia crede ce on ta es repetente reincarneda asta la tempo cuando on dedica se a la asteni de la la mundo material. Un om pote es reincarneda como un fem e en reversa, donce la idea de jenero ave no sinifia. La spirito ia es lo cual es la plu importante per de catares, e ia es descriveda como nonmaterial e sin jenero. Como un resulta de esta crede, la catares vide femes como egal capas de servi como xefes spirital, cual no acorda con la conseta de jenero tenida par la Eglesa Catolica.

La ideas de la catares e relijios simil es perene, e ia emerji en multe edas e partes de la mundo, an en la tempo moderna.