Buco de boton

Bucos de botones es bucos fortida en stofa tra cual botones pote es traeda, cual permete ce un peso de stofa es liada a un otra. La bordas cru de la buco es tipal finida con puntos coseda. Esta pote es fada par mano o par cosador. Alga formas de boton, como la anelos trensada (engles: frog, franses: brandebourg), usada un anelo de stofa o corda en loca de un buco.

Bucos de botones per clui o securi vestes con botones ia apare prima en Deutxland en la sentenio 13. Algas crede ce la persianes antica ia usa lo prima. En Europa, los deveni popular cuando un moda de vestes streta ia comensa en la sentenios 13 e 14.

En cose par mano, per un buco simple, un ranur es fada prima. Alora, la bordas cru (cortida) de la stofa es completida con filo en puntos multe prosima a lunlotra. La construi inclui a veses un tecnica en cual un peso plata de corda o filo (engles: gimp, franses: cordonnet) es incluida en la bordas per forti la borda.

En cosa con un cosador, la ranur entre la lados de la buco es abrida pos la completa de cose. Orijinal, bucos de botones ia es fabricada par du linias paralel de puntos zigzaga (la du lados de la buco), completida par du puntos zigzaga a cada fini de la buco. Un varia es nomida la buco de clave: a un fini, un buco ronda es coseda con un cresente de puntos semblante un vano. Esta es usada xef per jacas de stofa spesa, como de lana. Un plu varia es un buco bondida, en cual la bordas es caxida par pesos de stofa en loca de puntos de cose.

Un de la prima macinas per crea bucos de botones automata ia es inventada par Henry Alonzo House en 1862. Oji, cosadores comun ave spesial "pedes" cual pote es ajuntada sirca la ago cual automati la prosede de crea bucos de botones.