Micmac
La micmaces es un popla de la Nasiones Prima (la terma en Canada per americanes orijinal) de la tera de bosces norde-este, la areas aora nomida la Provinses Atlantica e la Penisola de Gaspe de Quebec, e la rejion norde-este de Maine. Los nomi sua teritorio nasional Mi'kma'ki (o Mi'gma'gi). La nasion ave sirca 170,000 persones, de ci cuasi 11,000 parla la lingua micmac, un lingua de la familia de linguas algoncian. En la pasada, la lingua ia es scriveda en la ieroglifos micmac; lo es aora scriveda con la alfabeta latina.
La Santé Mawiómi (Consilio Grande) ia es la nivel senior de governa per la popla, asta Canada ia pasa la Ata Indian de 1876 per comanda ce la Nasiones Prima institui governas de representores elejeda. Pos la cambia, la Consilio Grande ia prende un rol plu spirital. Lo ia es composada de xefes de la consilios de la sete distritos de Mi'kma'ki.
La nom "micmac" es la spele comun en engles asta la desenio de 1980. Aora, la plu de publicas usa la spele Mi'kmaq, cual es prefereda par la popla. La Mi'kmaw Resource Guide dise ce Mi'kmaq sinifia "la familia". Ma la popla mesma nomi se la Lnu'k (o Lnu'g), cual sinifia "umana" o "la popla".
On ave un fende linguistica alga profonda entre la lingua micmac e la algoncianes este a sua sude-ueste, cual sujesta ce la micmaces ia developa un segue cultural preistorial autonom en sua teritorio. La cultur ia asentua un orienta a la mar, car la area no ia ave multe sistemes de rios major. Los ia abita en un clima cual no promove cultiva; en loca, los ia oganiza se en grupos peti de alga familias relatada patrilinial. Los ia es seminomada e ia susiste sur pexa e xasa. Xefia no estende plu ca la condui de grupos xasante.
La micmaces ia segue un sicle anial de move entre la campos invernal, sperdeda tra la interna, e comunias costal plu grande en la estate. En marte, la grupos ia converje a la rivetas con pexes oviparinte. Alora, los ia colie arenges e ovos de avias acual, e ia xasa gansos. Per maia, la costa ia ofre gado e moluscos, e la ventetas costal ia ofre releva de la moscas, moscitos, e otra insetos mordente. En autono, los ia colie la angilas oviparinte. Alora, grupos peti ia sperde a la interna do los xasa alces e renos, de cual los usa tota partes: la carne per come, la pel per vestas, tendones e ligamentos per cordas, e osos per siseli e utiles. Otra animales xasada o trapida ia inclui servos, ursos, coneos, castores, porcospinas, e animales peti.
La dentes e garas de ursos ia es usada como decora en vestes ritual. La femes ia usa ance la spinas de la porcospinas per crea decoras sur vestes, mocasines, e otra cosas de cuoro. La arma usada la plu per xasa ia es la arco e flexas.
La micmaces ia abita strutures nomida uiguames. Los ia talia arbores joven, plu comun piseas, e ia curva los sur un sirculo detaliada sur la tera. Estas ia es liada con lunlotra a la culmina, e alora covreda con la cortex de betul. La micmaces ia ave du grandias de uiguames: la plu peti pote conteni 10 a 15 persones, e la plu grande 15 a 20. Uiguames ia pote sembla conos o cupolas.
A 24 junio 1610, xef grande Membertou ia converti a catolicisme e ia es batizada. El ia conclui un alia con la jesuitas franses cual ia afirma la direto de la micmac per eleje catolicisme e/o la tradisiones micmac. La micmac, como asosiores de comersia con la franses, ia acorda con colonia limitada de la franses en sua teritorio.
Alga micmaces atende la eglesa catolica, algas segue sola la relijio tradisional de la micmaces; ma multe ia adota ambos, la resulta de la conveni entre cristiania e la tradisiones micmac. Etnolojiste Angela Robinson ia scrive un studia profonda de ambos en sua monografia Tán Teli-Ktlamsitasit (Ways of Believing): Míkmaw Religion in Eskasoni (2005).
Pos la Gera de Re Phillips entre la colonistes engles e americanes orijinal en New England sude, la micmac ia deveni membros de la Wapnáki, un alia con cuatro otra nasiones algoncian: la abenacis, penobscotes, pasamacuodis, e la malisetes. La confedera ia alia con la colonistes franses en Acadia. En un periodo de 75 anios de 6 geras en Mi'kma'ki (Acadia e Nova Scotia), la micmac ia luta per para la engles de vinse la area. Ma Frans ia perde controla militar de Acadia en 1710.