Judit Polgár

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.

Judit Polgár (Budapest, Madjaristan, 23 de Djulio de 1976) es una eskakista madjaristana, konosida komo la mas grande djuegadora de eskakes de la istorya; tiene el titolo de Gran Maestra Internasionala. Eya es la unika mujer en la istorya ke klasifiko al Shampionato Mondial de Eskakes, en 2005. Eya es la primera, y unika mujer ketiene pasado el limito de los 2700 puntos Elo, yegando a tener 2735 i el ocheno lugar mondial, en 2005. Es la unika mujer ke yego al top ten de la klasifikasion mondiala, yegando a esta lista en Jenero de 1996.

Polgár es la unika mujer enel olam ke tiene ganado un djuego en kontro de un atkual shampiyon mondial, i endemas vensio onze shampiyones mondialos aktualos o de antes en djuegos klasikos o pishines de eskakes: Magnus Carlsen, Anatoly Karpov, Garry Kasparov, Vladimir Kramnik, Boris Spassky, Vasily Smyslov, Veselin Topalov, Viswanathan Anand, Ruslan Ponomariov, Alexander Khalifman, i Rustam Kasimdzhanov.

Judit nasio en una famiya djudia. La su nona era yevada al Kampo de Auschwitz, ma bivio diskues del Olokosto. Judit ambezo a djuegar eskakes por modre del su padre, László Polgár, el kualo desvelopo un sistem de edukasion para las sus ijas ande eskakes tinia un lugar espesial.^[1] La su ija behora, Zsuzsa Polgár, es tambien Gran Maestra Internasionala i la sigunda, Zsófia Polgár, es Maestra Internasionala. El padre no desho ke las sus ijas djuegaran en turnamentos para mujeres, ma solu en turnamentos absolutos. Él i la su espoza, Klára, edukaron las sus ijas en kaza, ambezando endemas de eskakes, la lingua internasionala Esperanto. El governo de Madjaristan no aresivio esta edukasion kon plazer, deke no era "sosyalista", endemas de alkunos djurnalistos oksidentalos ke dishian ke las ninyas no bivian una chikez de ninyas normalas.

Se espozo enel anyo 2000 kon el veterinario Gustav Font. Se arreto dos vezes en la su karriera, en Ogusto de 2004 para tener al su ijo Olivier, i en Djunio de 2006 para tener ala su ija Hanna.

Eya gano por la prima vez a un Maestro Internasional, Dolfi Drimer, ala edad de 10 anyos, i a un Gran Maestro, Lev Gutman, kuano era de 11 anyos de edad.^[2]

En Noviembre de 1988, Judit i sus dos ermanas apresentaron a Madjaristan en la XXVIII Olimpiada Mondiala de Eskakes en Salonika, Yavan. Eduard Gufeld, Gran Maestro de la Union Sovyetika i treinador del ekip de mujeres del su payis, disho de las ermanas Polgár "Kreygo ke estas mansevas van a pedrer la imaje ke tienen pishin en la Olimpiada 28..diskues vamos ver si es vedrad ke las ermanas de Madjaristan son espesialas o son solu mujeres"^[3] Ma afilu, el ekip de Madjaristan gano el shampiyonato mondial, ke era la prima vez que no ganava a Union Sovyetika. Judit aresivio la medalya de oro individuala.^[4]

Judit entro en el top 100 de la lista de djuegadores de eskakes de edad de 13 anyos. Aresivio el titolo de Gran Maestra en 1991, kuando era de edad de 15 anyos i 4 mezes, siendo en el momento la persona mas manseva del olam en aresivir este titolo. Konsigio la viktoria en el Shampionato de Madjaristan de 1991, i endemas en los turnamentos de Hastings (1992-1993) i en Madrid (1994), ganando djuegadores emportantes komo Gata Kamsky, Aleksei Shirov o Valeri Salov. Endemas, gano el turnamento de Stornoway, enel anyo de 1995.

En Sietembre de 2002, vensio a Garry Kasparov enel Russia versus the Rest of the World Match, siendo la primera mujer en azerlo.^[5] Diskues de pedrer, Kasparov salio ala siedra por un koridor defendido de djurnalistos i fotografos. Kasparov dijo una vez ke Polgár era "kukla de sirko" i ke las djuegadoras de eskakes tenian ke tener ijos i no djuegar. ^[6] Polgár yamó el djuego, "Uno de los momentos mas emportantes de la mi karriera", aziendo istorya ya ke era la prima vez en la istorya del eskakes ke una mujer ganava al djuegados numero 1 del olam en un tournamento ofisial.^[7]

En 2013, aresivio la medalya de la Orden de Onor de la Repuvlika de Madjaristan. ^[8] En Ogusto de 2015, arevisio la medalya de la Orden de San Esteban de Madjaristan, el onor mas grande ke puede aresivir un sitizeno en Madjaristan. ^[9]

El 14 de Ogusto de 2014. Judit se kito del olam de kompetensias de eskakes a traverso del su konto en Twitter.