Hamlet liikemaailmassa

Hamlet liikemaailmassa (‘Hamlet in mundo negotiali’) est pellicula absurda albo nigroque colore distincta ab Aki Kaurismäki moderatore cinematographico Finnico anno 1987 disposita. Fabula illá pelliculá narrata peculialiter in mundo negotiali Finnico annorum 1980 aetatis yuppie posita fabulam Hamlet Gulielmi Shakesperii repetit, quamquam ironice et parodice genus film noir simulat. Res comica tamen temperata et litterata est, et pellicula eventa fabulae Shakesperii satis diligenter sequitur. Genus agendi theatralitatem puram redolet, et histriones sollerter partes adfectatas agunt. Elegantia visualis nigro alboque distincta ad historiam refertur realismumque narrationis e conspectu spectatorum tollit. Histriones sollerter personas adfectatas agunt. Hamlet liikemaailmassa tragicomoedia est, quae res severas tractat, sed incredibilitas meditata pelliculae risum movet.

Conlocatio fabulae Shakesperii in aula regia Daniae mediaevalis sita est. Kaurismäki autem eventa pelliculae suae in negotio industriali Finnico conlocat, quod anates gummeas fabricatur. Hamlet (Pirkka-Pekka Petelius) proles adultus magnae gentis industrialis est, cuius pater a Claudio (quem agit Esko Salminen), rectore a negotiis et viro secundo societatis veneno necatur. Deinde illius matrem homicidio viduatam (quae ab Elina Salo agitur) in matrimonium inlicit munus directoris generalis societatis adfectans. Ex altera parte Hamlet post patris mortem ad possessionem negotii familiae procedit, sed inperitus rerum negotialium in conventu sociorum puerili modo separatim sedet et, dum "adulti" de fabrica inter se deliberant, incolores figuras libelli sui calamo colorat. At ut primum de suis operis experrectus socios vendendae officinae consilium capere audit, surgit et tabaco accenso dicit se, quippe qui maioritatem sortium possideat, haec consilia repudiare.

Hamlet Opheliam Polonii filiam modo suo timido-frigido amat et donis captare conatur, et Ophelia, quamquam Hamlet male se gerit, contra voluntatem patris et fratris bene respondere videtur. Hamlet matrem suam, quia Claudio malevolo nupserit, odio habet. Iam diu Claudium insidiantem clam auscultaverat, et adcelerante tortuoso potestatis certamine strages cadaverum eatenus augetur, ut praeter Hamlet nemo nisi auriga cum uxore suo restet. Haec est digressio inopinata (quae quidem ex Kaurismäki exspectari potest) ab argumento Shakesperii, nam postremo operarius vulgaris (auriga) victoriam reportat.

Partes primariae

• Pirkka-Pekka Petelius : Hamlet
• Esko Salminen : Claudius (qui Claudio tragoediae Hamlet respondet)
• Kati Outinen : Ophelia
• Elina Salo : Gertruda
• Esko Nikkari : Polonius

Partes secundariae

• Kari Väänänen : Laertes
• Puntti Valtonen : Simo (auriga Hamleti)
• Mari Rantasila : Helena (ancilla)
• Pentti Auer : Hamleti pater
• Matti Pellonpää : custos

Kaurismäki aetate iuvenili interdum temporarias particulas absurdarum facetiarum puerilium coluit, sicut hoc: Hamlet, ubi ancillam culinariam videt pernam secare, inpulsu animi se operae inmiscens "Pernam, patere me ..." inquit et cultro sibi magnum secat frustum, quod manu tenens manducare incipit. (In editione textu Anglico praedita, Hamlet simul se praesentat. Dicit enim "Ham,let me ...).

Monologum notum "Esse an non esse" Kaurismäki se omisisse dixit, quia "non vacat Hamlet modernus de quaestionibus aeternitatis cogitare".^[1]

• Croteau, Melissa M. (2008) Aki Kaurismäki’s Hamlet Goes Business: A Socialist Shakespearean Film Noir Comedy, Shakespeare’s World/The World Shakespeares, 194–205. Associated University Presse.
• von Bagh, Peter (1991) Työmiehen muotokuva ('Effigies operarii'). Filmihullu.

• Praenuntiatio pelliculae.
• Hamlet et frustum pernae.