Брест

Брест (1921-жылга чейин Брест-Литовск, 1939-жылга чейин Брест-над-Бугом) — Беларустагы шаар. Брест облусунун административдик борбору. Мухавец дарыясы Батыш Буг дарыясына куйган жеринде, Беларуссия менен Польшанын чек арасында жайгашкан. Калкы 344,4 миң (2024). Дарыя порту (Днепр-Буг жолунун башталышы) жана темир жол тоому. Брест аркылуу Берлин Варшава Москва автомагистралы өтөт. Электр-техникалык, машина куруу (газ аппаратура), жеңил (байпак комбинаты, килем-нооту бирикмелери, тор, кийим тигүү фабрикалары), тамак-аш өнөр жайы өнүккөн. Эмерек, сувенир, тиричиликке керектүү химиялык буюмдарын, курулуш материалын чыгарат. Үч жогорку окуу жайы, эки театр, Брест чебин коргоо, край таануу жана башка музейлери бар. Эл аралык фестивалдар (театр, кино) өткөрүлүп турат. 1017-жылдан (Берестье) белгилүү. 14-кылымдан Литва менен Польшанын, 1795-жылдан Орусиянын, 1919–1939-ж. Польшанын курамында болгон. Архитектура эстеликтеринен сепил, собор, кафедралуу собор, чиркөөлөр, темир жол вокзалы жана башкалар сакталган.

• “Кыргызстан” улуттук энциклопедиясы: 2-том. Башкы редактору Асанов Ү. А. К 97. Б.: Мамлекеттик тил жана энциклопедия борбору, 2007. 808 бет, илл. ISBN 978 9967-14-055 -4