Sarkadalılar

Sarkadalılar denesinde qattı qabıq bolmaydı, kletka tsitoplazması tek tsitoplazma membranası menen sırtqı ortalıqtan ajıralıp turadı. Sarkadalılar yamasa tamır ayaqlılarda háreket organellası - jalǵan ayaq (psevdopodiy)lardıń bolıwı tán belgi esaplanadı. Ol tsitoplazmadan payda bolǵan turaqsız ósimshelerden ibarat. Sarkadalılarda qaplaǵısh pellikula bolmaydı. Biraq geyparalarında qabıq, baqanshaq bolıwı mumkin. Jalǵan ayaqlar párik tárizli (lobopodiylar), sabaq tárizli (filopodiylar), nur tárizli (askopodiylar) hám tor tárizli (retikulopodiyler) pishinde bolıwı mumkin. Jalǵan ayaqlar azıqtı sińirip alıw wazıypasında atqaradı. Sarkadalılar kletkasında bir yamasa bir neshe yadro bar. Dushshı suw hám topıraqta jasawshılarda qısqarıwshı vakuoli boladı. Barlıq bir kletkalılar sıyaqlı bularda dene sırtı menen dem aladı. Sarkadalılar kobinshe ekige bóliniw, geyde búrtikleniw arqalı jınıssız kóbeyedi. Jınıslı kóbeyiwi qamshılı yamasa amyoba ayaqlı (qamshısız) gametalar payda qılıw jolı menen ótedi. Bularǵa 11 mıńnan ziyat túr kiredi. Dushshı suwlarda, teńiz, okean hám topıraqta erkin jasaydı. Ayırım túrleri parazit esaplanadı. Sarkadalılar tamır ayaqlılar, nurlılar hám quyashsımaqlar klasslarına bólinedi.