Hifa

Hifa (basa Latin: hypha, jamak hyphae) iku struktur biologis wujud berkas-berkas alus kang wujud péranganing badan vegetatif manéka fungi ("karajan jamur"). Hifa bisa kanthi gampang dideleng nganggo mata yèn wis mbentuk massa kang rapet lan mbentuk koloni-koloni ing pérangan badan organisme inang utawa sisa-sisa organisme utawa panganan, ditepungi minangka miselium (mycelium, jamak mycelia). Bisa ditelakaké, hifa iku wujud badan jamur kang sabeneré. Struktur kanthi wangun mèmper payung kang biyasa ditepungi wong minangka jamur ora liya mung piranti réprodhuksi kang ditepungi minangka badan woh, kang muncul mung nalika-wektu.

Kanggo fungi, hifa duwé peran kang sithik okèh kaya oyot lan godhong ing tetuwuhan sisan. Hifa tuwuh nyebar sajeroning badan utawa kabèh pérangan organisme. Wangun hifa kang alus miyaraké lumah kontak karo substrat (obyèk panganané). Hifa banjur ngeculaké enzim utawa substansi liya (mligi ing fungi kang urip ing jaringan urip) ing substrat supaya sabanjuré diasilaké senyawa-senyawa kimia tinentu (mligi karbohidrat). Hifa banjur nyerep manèh senyawa-senyawa kimia iki kanggo dimupangataké sajeroning metabolisme internal. Cara makarya kaya iki kang njalari fungi béda karo eukariota liyané, kaya tetuwuhan (autotrof) utawa kéwan (sapenuhé heterotrof). Fungi, kanthi cara makarya hifa kaya iki, ditepungi minangka saprotrof.

Saberkas hifa iku sèl tunggal. Siji koloni hifa kang bisa dianggep kumpulan sèl-sèl raseksa lumrahé wanguné bunderan kanthi dhiameter sapérangan sentimeter. Sanajan mangkono, sapérangan fungi/jamur alas duwé jaringan hifa nganti puluhan mèter dhiameteré.

Hifa biyèn dinggo mbédakaké kelas-kelas ing fungi. Fungi mawa hifa ora ana sekaté (Phycomycetes, "jamur ganggang") dibédakaké saka kang mawa sekat (Ascomycetes, Basidiomycetes, lan Deuteromycetes).