Abu Hurairah

Abdurrahman bin Shakhr Al-Azdi (basa Arab: عبدالرحمن بن صخر الأذدي‎) (lair 598 - séda 678), kang luwih misuwur kanthi aran Abu Hurairah (basa Arab: أبو هريرة‎), yaiku sawijining Sahabat Nabi kang misuwur lan minangka periwayat hadits kang paling akèh disebutaké sajeroning isnad-e déning kaum Islam Sunni.

Ibnu Hisyam kandha yèn jeneng asli Abu Hurairah yaiku Abdullah bin Amin lan uga ana kang kandha yèn jeneng asliné yaiku Abdur Rahman bin Shakhr.^[1]

Abu Hurairah asalé saka kabilah Bani Daus, Yaman. Kira-kira dhèwèké lair 21 taun sadurungé ijrah, lan kawit cilik wis dadi yatim. Jeneng asliné ing mangsa jahiliyah yaiku Abdus-Syams (hamba srengéngé) lan dhèwèké diarani Abu Hurairah (bapak/wong kang duwé kucing) amarga seneng ngopèni kucing. Nalika isih enom, dhèwèké nyambut gawé ing Basrah binti Ghazawan, kang candhaké sawisé nganut agama Islam banjur dikawini.

Thufail bin Amr, sawijining pamimpin Bani Daus, bali ing kampungé sawisé ketemu karo Muhammad lan dadi muslim. Dhèwèké nywarakaké supaya lumebu Islam, lan Abu Hurairah énggal-énggal kandha yèn kepéncut sanajan ora sithik kaumé nalika iku kang nampik. Nalika Abu Hurairah lunga bebarengan karo Thufail bin Amr menyang Makkah, Muhammad ngowahi jenengé Abu Hurairah dadi Abdurrahman (hamba Maha Pangasih). Dhèwèké manggon karo kaumé sapérangan taun sawisé dadi muslim, sadurungé nggabung karo kaum muhajirin ing Madinah taun 629. Abu Hurairah tau njaluk tulung marang Nabi supaya ndongakaké ibuné kareben nganut Islam, lan pungkasané uga nganut. Dhèwèké tansah ngetutaké Muhammad nganti tekan wafaté Nabi taun 632 ing Madinah.

Umar bin Khattab tau ngangkat Abu Hurairah dadi gubernur wewengkon Bahrain kanggo mangsa tartamtu. Nalika Umar duwé kekarepan ngangkat manèh kang kaping pindhoné, dhèwèké nampik.

Nalika ana panentangan antarané Ali bin Abi Thalib lan Muawiyah bin Abu Sufyan, dhèwèké ora mihak salah sijiné.

Abu Hurairah yaiku sahabat kang paling akèh ngriwayataké hadits saka Muhammad, yaiku cacah 5.374 hadits. Ing antarané kang ngriwayataké hadist saka dhèwèké yaiku Ibnu Abbas, Ibnu Umar, Anas bin Malik, Jabir bin Abdullah, lan liya-liyané. Imam Bukhari tau kandha: "Kacathet punjul 800 wong perawi hadits saka kalangan sahabat lan tabi'in kang ngriwayataké hadits saka Abu Hurairah".