Kakawin Arjunawiwāha/Pupuh 30

Pupuh 30 – Kṛti

1.

• a. wara Menakā sira kinon surapati marĕkê Dhanañjaya
• b. sira katwang ing surawadhū pinituhu tĕkap ing sakahyangan
• c. tuwi tan waneb tuha-tuhânggĕhira makakulârya Phalguna
• d. sira tângucap kadi lumālana siwuhĕn i sang Dhanañjaya

2.

• a. laki hantusākĕna ta gañjaran ing amĕnang ing raṇānggana
• b. pratuhun pamañcana niki n kapitu bapa tĕkap nṛpâtmaja
• c. hayu cakrawartining arūm pinakaguru manis kinatwangan
• d. ring ulah wagĕd paḍa huwus mayaśa paḍa tĕlas makabwatan

3.

• a. nya ta Suprabhfinita-nitan lihati makalawan Tilottamā
• b. tĕkap ing maminta parihêring awahiri ḍatĕng tatan humung
• c. amĕnang hiḍĕpnikang alah makin araras arumpukan gaḍung
• d. papagĕn liringnya laki mĕnggĕp anguwahi gĕlungnya tan lukar

4.

• a. nya waneh dṛdhâmaca wilāpa hana wahu huwus madarpana
• b. gumĕlung-gĕlung kaka-kakanya sinuru-suruyanya ring tangan
• c. hana manggupit ruditagīta manam-anama hastakośala
• d. kadi hintĕn esi dinĕlö t-ingĕt-ingĕtakĕn ing pasanggaman

5.

• a. wĕkas ing wĕkas tiki kabeh ndatak amihĕri taku ring waneh
• b. laku ta t-ruhun tumama ring tilam aku mutusêka ng aywana
• c. iti mangkanôjarira sang winuwusan atiki n salah sahur
• d. angucap waneh kadi nirāgraha tuhun umasuk marêng jinĕm

6.

• a. wara Suprabhā sira kinon mamungarana rikang samangkana
• b. phalaning huwus mapihutang priya parĕng umasuk marêng jinĕm
• c. alawas patūtnira lawan padulurira ri kāla ring hĕnū
• d. rasa tan papanggila kinol rĕngu-rĕngunira tan tĕkê hati

7.

• a. arĕnah sang Arjuna marĕk-marĕk angusapi gātra pet siwi
• b. anĕpak tangan sang anulak wahu-wahu kinayuh tĕngahnira
• c. asaput-saput susu parĕng rwa karika tinahānikang ulah
• d. alĕmĕh katona tumukup kĕtĕ-kĕtĕgira mār sumamburat

8.

• a. mawuwus ta sang nṛpatiputra mijil upas ikang karāsikan
• b. ibu tâsyasih mapa manista n alarisa halista yan lihat
• c. awanĕh rĕngunta yat amöm waja huwus atasak mirahnikā
• d. larani nghulun hinĕnĕngan kadi mangucap-ucap lawan rakĕt

9.

• a. mapa dening ahyas ibu ngūni karaṇaning anĕmwakĕn hayu
• b. mangunĕng galuh karika nitya karamas ing anöbakĕn gĕlung
• c. apupur mĕnur mawida kĕmbang asana karikā dyah i nghulun
• d. athawâsusur tĕbu kita dyah ari tuhagaṇâpĕpĕh madhu

10.

• a. sira sang minangkana kahĕnti hatinira tuhun mapet siwi
• b. angĕlih-ngĕlih makasahur pangĕsahira lawan rĕngihnira
• c. katĕmu pwa muṣṭini tapihnira lukar irikân tiniṇḍihan
• d. mata mesi manmatha tininghalakĕn i mata tan lumis mata

11.

• a. ri huwusnirân kawawa mukṣa hatinira manguṇḍĕng ing dagan
• b. anangis tumungkul umusap haringĕtira matūt grĕt ing tĕngah
• c. asaput hulĕs juga sirâgila tĕkap i mĕlĕs nikang tapih
• d. mwang ikang pupū kadi kukū gaḍing amaya-maya tĕkĕ wĕtis

12.

• a. nṛpaputra matyakĕn awaknira ring ulah arūm priyambada
• b. tĕka ping rwa pintiga sirênubhayan añar atūt ulahnira
• c. wuluh angharas tĕbu papanggihira paḍa rināmyaning manis
• d. angĕnoh wawang matĕmu ros matĕmu wuku silih dĕlö mata

13.

• a. ndah aneka lālana pararyananira sumukhāna ng indriya
• b. hana yan wijil sumĕlang ahyas ajajar atitih-titih pupū
• c. angatag narendraputra mañjinga ñamu-ñamu ring rasâdhika
• d. gĕtih ing kukap kadi tĕgĕl mamutani kadi hampas ing madhu

14.

• a. kramakāla meh tĕka ta nālikanira matutur ta Suprabhā
• b. tumurun marêng bañu tĕhĕr mulih amirah ikang matâpĕde
• c. akĕdö-kĕdö laku nirâmiru-miru tĕpining tapih lukar
• d. tumiling-tiling mulat i sor masĕmu rĕngu paran kunang katon