Heimakoma

Heimakoma (Erysipelas), einnig kölluð húðnetjubólga og ámusótt, er algeng húðsýking sem orsakast af keðjusýklum, sem komast inn um sár og sprungur í húðinni. Ef ómeðhöndluð getur hún verið alvarleg.^[1]

Fyrsta einkenni heimakomu er bólginn roði í húð, oftast þar sem er sprunga eða sár. Roðinn er oft heitur og viðkvæmur við snertingu. Smám saman mun roðinn breiðast út og stækka. Rauð strik geta myndast á húðinni sem liggja eftir sogæðunum til næstu eitla. Önnur einkenni eru almenn vanlíðan, hækkun líkamshita (sótthiti) og skjálfti.

Heimakoma getur komið fram hvar sem er á líkamanum en er algengust á fótleggjum og í andliti.^[2]

Mælt er með að leita læknis ef þú hefur grun um að hafa heimakomu. Ef heimakoma er ómeðhöndluð getur hún valdið blóðsýkingu.^[3] Einnig er mikilvægt er að loka fyrir leið baktería inn í líkaman.^[4]