Greenpeace
Greenpeace (liðsmenn samtakanna eru stundum kallaðir „Grænfriðungar“ á íslensku) eru ein þekktustu náttúruverndasamtök heims. Þau voru stofnuð í Kanada 1971. Samtökin reka 26 svæðisskrifstofur með starfsemi í 55 löndum um víða veröld. Höfuðstöðvar þeirra eru í Amsterdam í Hollandi. Starfsmenn samtakanna eru 2400 talsins auk um 15.000 sjálfboðaliða. Þau hafa tekjur sínar af frjálsum framlögum frá um 2,9 milljón stuðningsaðilum, að því er talið er, en taka ekki við opinberu fé. Helstu baráttumál samtakanna eru loftslagsbreytingar, skógaeyðing, ofveiði á höfunum, hvalveiðar í atvinnuskyni, erfðabreyttar lífverur og kjarnorka.
Á Íslandi eru samtökin kunnust fyrir baráttu sína gegn hvalveiðum Íslendinga. Helgi Björnsson söng lagið „Undir regnboganum“ á samnefndri sólóplötu árið 1991 þar sem fjallað er um Greenpeace. Samtökin hafa ekki haft starfsemi á Íslandi en hafa stundum átt opinbera talsmenn. Árið 1989 reyndu samtökin að fá lögbann sett á sýningu heimildarmyndar Magnúsar Guðmundssonar, Lífsbjörg í Norðurhöfum, þar sem fjallað var um aðferðir Greenpeace við að berjast gegn veiðum á sel og hval á Norðurslóðum.
