Andaluzia

 

Andaluzia havas entote 87 268 km², okupanta 17,3% de Hispana teritorio. Lua tota surfaco esas poke min granda kam olta di Serbia. Ol esas la maxim sudala ek la regioni di Hispania, havanta terala frontieri kun Portugal weste e Gibraltar sude, e marala frontiero kun Maroko sude.

La reliefo di la regiono alternas monti de tale nomizita "Sierra Morena", basa tereni de tale nomizita "Depresión Bética", e la montoza regiono nomizita "Sierra Nevada", ube jacas la maxim alta monto di la regiono, Mulhacém, kun 3 478,6 metri di altitudo.

Lua dominacanta klimato esas mediteranea, kun sika someri e kolda e pluvoza vintri. En l'alta montopinti di Sierra Nevada nivas dum vintro. En Andaluzia jacas la sola dezerto existanta en Europa: dezerto Tabernas, havanta entote 280 km² e distanta cirkume 30 kilometri norde del urbo Almerías.

La fluvii di la regiono fluas sive vers Atlantiko, sive vers Mediteraneo. La maxim importanta ek li esas Guadalquivir, longa de 657 kilometri, qua naskas proxim Sierra Nevada e debushas proxim Sevilla, che regiono Donaña. Lua baseno okupas 57 071 km². Fluvio Guadiana formacas naturala frontiero kun Portugalana teritorio. Inter la fluvii qui fluas a Mediteraneo la maxim longa esas Guadalhorce, longa de 154 kilometri.

Andaluzia subdividesas en 8 provinci:

• Huelva
• Sevilla
• Kórdoba
• Jaén
• Granada
• Almería
• Málaga
• Cádiz