Servitudo
Servitudo, segun defino dal civila yurocienco, esas obligeso o debo a qua submisesas imoblo koncerne altra imoblo. Exemple, se ula imoblo jacas interne di altra imoblo e komplete cirkondesas da olta, la proprietanto dil extera imoblo mustas grantar, al proprietanto dil interna imoblo, aceso terala, fluviala, marala od altra ad olca, por ke lu povez ekirar od enirar olca. La proprietanto dil extera imoblo, segun la lego, ne darfas impedar l'aceso dil interna imoblo. Konseque, en ca kazo, restriktesas lua proprieto-yuro pri la loko koncernata dal servitudo.
Altra exemplo esas la kloako-tubi e l'aquo-tubi en rezidala edifici qui havas plu kam 1 etajo: la tubi qui transportas aquo de la sulo al alta apartamenti, o la sordidaji del alta apartamenti a la subsulo, trairas la parieti dil suba apartamenti.
La legaro di multa landi povas agnoskar multa exempli pri servitudo, exemple kande granda elektro-kabli qui transportas elektro trairas privata proprietaji e bezonas susteneso per elektrala turmi. La proprietanto di la tereno ne perdas olca, e darfas, exemple, transportar bestii de un latero a l'altra, o transirar sub la kabli. Tamen lu ne darfas removar o modifikar la turmi e la kabli segunvole, nam to afektus altra proprietaji. Lu mantenas la proprieto di la zono koncernata dal servitudo, ma kun restrikta yuri pri ol.
