Andorra la Vella

Andorra la Vella

DEC
Wopon
Zakładne daty
stat	Andorra
wysokosć	1.011 metrow n.m.hł.
přestrjeń	12 km²
wobydlerstwo	32.128 (2016)
hustosć zasydlenja	2.677,3 wob./km²
webstrona	comuandorra.ad
Casa de la Vall, sydło parlamenta
p • d • w

Andorra la Vella (katalansce za „stara Andorra“; španisce Andorra la Vieja, francosce Andorre-la-Vieille) je stolica a z 22.000 wobydlerjemi zdobom najwjetše město stata Andorry w Pyrenejach. Wona je najwyše ležaca stolica w Europje a tež jedna z najmjeńšich.

Město je dla andorraskich dawkowych zakonjow wažne finančne stejišćo a nimo toho tež woblubowane srjedźišćo zymskeho sporta w Pyrenejach.

Městačko nadeńdźe so na juhozapadźe stata Andorra we wuchodnych Pyrenejach při zjednoćenju horinskeju rěčkow Valira d’Ordino (tež Valira del Nord) a Valira d’Encamp (tež Valira d’Orient), kotrejž tworitej tule rěku Valira.

Knježi měrna horinska klima z chłódnej zymu a ćopłym, suchim lěćom. Přerězne temperatury wučinja –1° C w januarje a 20° C w juliju.

Dokładny załoženski datum města njeje znaty, bě pak najskerje hižo w předkřesćanskej dobje. Wot lěta 1287, jako nasta přez hromadupołoženje francoskeho a katalanskeho nadknjejstwa w tutej kónčinje stat Andorra, bě Andorra la Vella jeho faktiska stolica, kotraž měješe wjace prawa hač tamne sydlišća. Městačko bě za tutón čas srjedźišćo izolowaneho feudalneho stata. Ze 16. lětstotka pochadźa Casa de la Vall, jedne z najstaršich twarjenjow w měsće a wot 1702 sydło parlamenta.

Hakle wot lěta 1993 ma Andorra swójsku wustawa, w kotrejž je mjez druhim zapisane, zo je Andorra la Vella jako sydło knježerstwa krajna stolica.

Domoródni Andorračenjo wučinja jenož 33 % wobydlerstwa, mjeztym zo su Španičenjo z 43 % najwjetša wobydlerska skupina. Wjetšina wobydlerjow je katolska.

 Commons: Andorra la Vella – Zběrka wobrazow, widejow a awdiodatajow