Ta’ãngamýi

Ta'ãngamýi, hérava avei ta'ãngasyry', ha'e ta'ãnga aty oñembohysýiva ohechauka gua'u mba'e omýiva ojekuaaukávo peteĩ mba'e rechahápe. Upéicha, ta'ãngamýi ningo mba'e omombe'úva tembiasa ta'ãnga rupive, ikatu avei oñembojoapy ipu ha iñe'ẽrã, taha'e ha'éva mba'e añetehápe oiko va'ekue térã gua'únte oñemombe'úva, avei taha'e ha'éva mba'e tapichakuéra ojapo térã mba'e oñemoha'ãngáva.^[1]

Ta'ãngamýi ojejapokuaa oñeguenohẽvo ta'ãngakuéra, upéicha ojejapo peteĩ ta'anga apoha rupive ojeheróva "kámara", ikatu oñeguenohẽ mba'e añetegua ra'ãnga, tapichakuéra oikóvo ñoha'ãngahára ramo kámara renondépe, térã mba'e oñemoha'ãngáva ra'ãnga, taha'e ha'éva ta'ãnga po rupive ojejapóva térã kombutadóra rupive.

Ta'ãngakuéra oñeñongatu ha upéi ojehechauka mba'e rechahápe. Ko'ág̃a, ta'ãngamýi ojejapo kombutadóra rupive, upe he'ise ndahasýi oñeñongatu ha oñemyasãi hag̃ua. Yma, oñembojoapy va'erã hese ipu ha iñe'ẽ, ta'ãngakuéra oñeñongatu mba'e apu'ápe ha ojekuaa peteĩ mba'yru guasu ombojerekuaáva pe mba'e apu'a ha ombohasáva mba'e rechahápe.

Ta'ãngamýi apo ningo mba'e hepy ha puku, ndaha'éi ta'ãnga ñeguenohẽ añoite, tekotevẽ tapichakuéra opaichagua omba'apokuaáva haihára, motenondehára, ao ha jeguaka apohára, ñoha'ãngahára ha pytyvõhára ramo. Upévare oĩ heta jopói oñeme'ẽva umi ta'ãngamýi ojehechakuaa porãvévape.