Ayrton Senna

Ayrton Senna da Silva (São Paulo, Pindoráma; 21 jasyapy ary 1960-Imola, Itália; 1 jasypo ary 1994) ha'e akue peteĩ mba'yrumýi pya'eite omboguatáva oñeñanihápe, ha'e Pindoráma pegua. Mbohapy jey ipu'aka Fórmula 1 ñani rembiesaráipe, Senna katu oĩ umi ipu'akavéva ha oñemotenondevéva apytépe ha hetaite he'i ha'e niko pilóto pya'evevaha ijojaha'ỹva.^[1]

Upe kuatiañe'ẽ herakuã héra Autosport 2009 aja oñe'ẽ 217 pilóto ndive (mba'yrumýi pya'eite omboguatáva) Fórmula 1 rehegua ojeiporavo hag̃ua umi pilóto ikatupyryvéva, ha omyakã kuri pe tysýi Ayrton Senna.^[2]

Ko pilóto oñani heta atyvetépe: Toleman, Lotus, McLaren ha Williams, ary 1984 ha 1994 mbytépe, ipu'aka Fórmula 1 ñani rembiesarái pavẽme 1988, 1990 ha 1991-me, osẽ mokõiha 1989 ha 1993-pe, mbohapyha 1987 arýpe ha irundyha 1985, 1986 ha 1992-me, upéicha ojehecha 41 jey ipu'aka (poteĩ jey Mónako Jopói Guasu ñeñaníme, mba'e ijojaha'ỹva ko'ãga peve).

Ayrton Senna omano imba'yrumýi oñembota vaíre Tamburello ñeñaníme, tape vore ikarapãitévape, ojejapo aja San Marino Jopói Guasu 1994 rehegua. Peteĩ mba'emi po'i ha puku kuarepoti ijapopyre osẽ imba'yrumýigui ha oike iñakãme, oikutu vai chupe ha omano. Pindoráma rekuái ojapouka mbohapy ára ñembyasyrã orojahe'o hag̃ua omano rire Ayrton Senna, amove peteĩ sua tapicha oho iñeñotỹme. Herakuãitégui ojegueromandu'a chupe oparupi.

Omano guive Ayrton Senna ha Roland Ratzenberger hetaite oñemoporã Fórmula 1 ani hag̃ua oiko jey upéicha.^[3]

• Wikimedia Commons oguereko ta'ãnga Ayrton Senna reheguaCommons.
• Sitio web memorial