Xesús Golmar

Xesús Golmar

Biografía
Nacemento	11 de setembro de 1908 Santiso, España
Morte	20 de xaneiro de 1962 (53 anos) Santiso, España
Alcalde de Lalín
11 de abril de 1936 – 24 de xullo de 1936 (destitución) ← Manuel Ferreiro Panadeiro – Bernardo Madriñán González →
Actividade
Ocupación	mestre, xornalista, político

Xesús Golmar Rodríguez, nado en Santiso (Lalín) o 11 de setembro de 1908 e finado na mesma parroquia o 20 de xaneiro de 1962, foi un mestre, xornalista e político galego, e o derradeiro alcalde republicano de Lalín.

Fillo de Manuel Golmar Cacheda, estudou o bacharelato en Lugo e fíxose mestre na Escola Normal de Santiago de Compostela animado polo seu parente e mentor Ramón Salgado Toimil. Foi mestre en Silvela (1931-33), Corvelle (1933-34) e Méixome (1934-36).

Colaborou nos periódicos El Ideal Gallego, La Provincia, Eco de Galicia, Heraldo de Galicia, El Pueblo Gallego, Atrás, Vida Escolar, Faro Villalbés, Razón, A Nosa Terra e Escuela Vivida, onde escribiu poemas e artigos pedagóxicos e políticos.

En 1934 ingresou no Partido Galeguista, e converteuse ao ano seguinte en presidente do Grupo Galeguista de Lalín (1935-36). Logo da destitución de Manuel Ferreiro Panadeiro nomeárono alcalde de Lalín o 11 de abril de 1936. A raíz do golpe de Estado do 18 de xullo de 1936 destituírono o 24 de xullo. Detido e xulgado en Pontevedra por auxilio á rebelión o 18 de novembro con José Crespo Torres e Miguel Lamas Iglesias, condenárono a cadea perpetua.^[1] Preso primeiro en San Simón, trasladárono ao Forte de San Cristovo (Pamplona) en febreiro de 1937, onde permaneceu ata setembro de 1940.^[2] En liberdade provisional, pero inhabilitado para o maxisterio, regresou a Santiso onde casou. Morreu sen ser rehabilitado como mestre.

Dende 2004 leva o seu nome un centro escolar de Lalín, o CEIP Xesús Golmar.

• Igrexas, Manuel (2005). Xesús Golmar. A Estrada: Edicións Fervenza. ISBN 84-96368-12-2. 

Predecesor: Manuel Ferreiro Panadeiro

Alcalde de Lalín  11-4-1936 - 24-7-1936

Sucesor: Bernardo Madriñán