Cinoglósidos

Cinoglósidos Cynoglossidae Linguas, linguas de can Rango fósil: eoceno (teciario tardío) - actualidade
Lingua de can das Canarias (Cynoglossus canariensis)
Clasificación científica
Reino: Animalia Filo: Chordata Clase: Actinopterygii Subclase: Neopterygii Infraclase: Teleostei Superorde: Acanthopterygii Orde: Pleuronectiformes Suborde: Pleuronectoidei Familia: Cynoglossidae Jorcan, 1888 [1]
Subfamilias e Xéneros
Véxase o texto

A dos cinoglósidos (Cynoglossidae) é unha familia de peixes teleósteos da orde dos pleuronectiformes e suborde dos pleuronectoideos ou soleoideos, distribuídos por áreas tropicais e subtropicais mariñas, entre os 40º de latitude norte e os 40º de latitude sur, así como en estuarios, e mesmo hai cinco especies que habitan nos ríos.^[2][3] que son coñecidos en galego como linguas e linguas de can'.^[4]

Apareceron por primeira vez no rexistro fósil no eoceno, durante o terciario inferior.^[5]

Algunhas das súas especies péscanse por teren certa importancia comercial.

As principais características morfolóxicas dos peixes desta familia son:^[2][3]

• Corpo ovalado, deprimido e moi alongado, de até 48 cm de lonxitude como máximo (usualmente duns 30 cm).
• Ollos moi pequenos e moi próximos entre si, ambos os dous situados no mesmo lado da cabeza (o lado pigmentado, que é esquerdo).
• Marxe do preopérculo cuberto pola pel.
• Boca asimétrica.
• Aleta caudal acabada en punta e confluente coas aletas dorsal e anal, formando todas un rebordo continuo ao redeor de todo o corpo do animal.
• A aleta pelviana dereita xeralmente subdesenvolvida. Sen aletas pectorais.
• A orixe da aleta dorsal á altura do ollo inferior.

A familia foi establecida en 1888 polo naturalista e ictiólogo estadounidense David Starr Jordan.^[1]

O nome da familia, Cynoglossidae está formado sobre a raíz do xénero tipo, Cynoglossus, coa terminación do latín científico ´-idae, propia dos nomes das familias de animais.

Pola súa parte, o nome Cynoglossus está formado polo elemento do latín científico cyno-, adaptación do grego antigo κυνο- kyno-, que deriva de κύων, κυός kýōn, kyós, "can", e do grego γλῶσσα glôssa "lingua": literalmente: "lingua de can", polo aspecto que presentan estes peixes.

Na actualidade recoñécense na familia dúas subfamilias, cunhas 140 especies agrupadas en tan só 3 xéneros:^[1]

Familia Cynoglossidae Jorcan, 1888

• Subfamilia Cynoglossinae Jordan, 1888
  • Xénero Cynoglossus (Hamilton 1822)
  • Xénero Paraplagusia (Bleeker 1865)
• Subfamilia Symphurinae Ochiai, 1963
  • Xénero Symphurus (Rafinesque 1810)

En Galicia está rexistrada en 1983,^[6] a especie Symphurus nigrescens (Rafinesque, 1810 (denominada lingua escura por Lahuerta e Vázquez),^[4] en fondos da plataforma continental menores de 200 m, desde Fisterra á Estaca de Bares.^[7]

Wikimedia Commons ten máis contidos multimedia na categoría:  Cinoglósidos

Wikispecies posúe unha páxina sobre:  Cinoglósidos

• Lahuerta Mouriño, F. e Vázquez Álvarez, F. X. (2000): Vocabulario multilingüe de organismos acuáticos. Santiago de Compostela: Xunta de Galicia. ISBN 84-453-2913-8.
• Moyle, P. & J. Cech (2000): Fishes: An Introduction to Ichthyology, 4a. edición, Upper Saddle River, New Jersey, USA: Prentice-Hall.
• Nelson, Joseph S. (2006): Fishes of the World. Nova York: John Wiley & Sons, Inc. ISBN 0-471-25031-7.
• Rodríguez Villanueva, X. L. e Xavier Vázquez (1995): Peixes do mar de Galicia. (III) Peixes óseos (continuación). Vigo: Edicións Xerais de Galicia. ISBN 84-7507-870-2.
• van der Land, J.; Costello, M. J.; Zavodnik, D.; Santos, R. S.; Porteiro, F. M.; Bailly, N.; Eschmeyer, W. N. & Froese, R. (2001): "Pisces", en: Costello, M. J. et al., eds. European register of marine species: a check-list of the marine species in Europe and a bibliography of guides to their identification. París: Muséum national d'Histoire naturelle. Collection Patrimoines Naturels, 50: 357-374. ISBN 2-85653-538-0.

• Osteíctios
• Pleuronectiformes

• Cynoglossidae en ADW.
• Cynoglossidae no ITIS.
• Cynoglossidae no NCBI.