O carniceiro

O carniceiro
Ficha técnica
Título orixinal	Le Boucher
Director	Claude Chabrol
Produtor	André Génovès
Guión	Claude Chabrol
Intérpretes	Stéphane Audran Jean Yanne Roger Rudel
Música	Pierre Jansen; canción de Dominique Zardi
Fotografía	Jean Rabier
Montaxe	Jacques Gaillard
Distribuidora	ParaFrance
Estrea	27 de febreiro de 1970 12 de setembro de 1970
Duración	93 minutos
Orixe	Francia Italia
Xénero	Drama e suspense
Na rede

O carniceiro (en francés: Le Boucher) é un filme franco-italiano, dirixido por Claude Chabrol en 1969 e estreado en 1970. A película foi rodada en Trémolat (Dordoña) e nas covas de Cougnac (Lot) entre setembro e outubro de 1969. Supuxo a terceira colaboración entre Claude Chabrol e Jean Yanne despois de La Ligne de démarcation (1966) e Accidente sen pegada (1969). Volveron traballar xuntos en Madame Bovary (1991).

Claude Chabrol fai unha referencia a Honoré de Balzac facendo ler á profesora un anaco do capítulo V da novela La Femme de trente ans como ditado escolar.

Na pequena vila de Trémolat, no Périgord (Dordoña), celébrase a voda do profesor Léon Hamel cunha rapaza do lugar. Entre os convidados á cerimonia están unha compañeira da profesora, Hélène David, que é tamén a directora da escola, e Paul Thomas, alcumado Popaul, o carniceiro da vila.

Hélène e Paul coñécense na voda e simpatizan. Atraído pola rapaza, o carniceiro cóntalle que para fuxir da violencia do seu pai se enrolou no exército e participou na guerra da Indochina e mais na guerra de Alxeria. Hélène, pola súa banda, procede de París e viviu unha historia de amor quue rematou mal. A mestra, que considera a Popaul como un amigo co que curar a súa soidade, faino partícipe nas actividades cos rapaces da escola e convídao a cear na súa casa.

A tranquilidade da vila disípase ao descubrirse o cadáver dunha moza do lugar, que morreu a coiteladas. Durante unha excursión cos alumnos, Helen descobre o corpo doutra rapaza, que resulta ser a muller de León, asasinada do mesmo xeito. Na escena do crime encontra un chisqueiro similar ao que lle regalara a Popaul polo seu aniversario, e recólleo. O comisario Grumbach, que leva o caso, interroga a Hélène. Unha noite, cando Popaul a visita, ela ofrécelle un cigarro para que el o acenda, e tranquilízase ao ver que aínda ten o chisqueiro que lle regalara.

Popaul axuda a Hélène a pintar o teito da súa vivenda, e mentres busca un pano descobre que nun caixón ten o chisqueiro que ela lle regalara, e que recollera xunto á segunda rapaza morta. Cólleo, e cando ela regresa a casa dille a el que tivo lugar un terceiro asasinato similar aos dous primeiros.

Hélène descobre que Popaul colleu o chisqueiro do caixón e pensa que é el o asasino das rapazas. Pola noite el chámaa para falar con ela, pero esta négase a deixalo entrar na escola. Asustada, pecha as portas e as ventás, pero mentres, el aproveita para colarse dentro. Armado coa navalla de resortes, explícalle os motivos dos asasinatos. De socato, apuñálase no abdome. Hélène lévao ao hospital, e na viaxe el confésalle os seus sentimentos. Na sala de espera pídelle un bico e ela dállo, e no ascensor de camiño ao quirófano morre.

Logo de abandonar o hospital, Hélène detense en plena noite a carón do río, abatida polo que pasou, e permanece alí até a alba.

• Stéphane Audran: Hélène David
• Jean Yanne: Paul Thomas, Popaul
• Roger Rudel: inspector Grumbach
• William Guérault: Charles
• Mario Beccara: Léon Hamel
• Antonio Passalia: Angelo
• Pascal Ferone: Padre Charpy
• Dominique Zardi
• Os habitantes de Trémolat

• Festival Internacional de Cine de Donostia 1970: Cuncha de Prata á mellor actriz para Stéphane Audran
• Premio Bodil 1971 ao mellor filme europeo para Claude Chabrol
• Nomeada aos Premios BAFTA 1973 á mellor actriz para Stéphane Audran

• O carniceiro na IMDb (en inglés).
• Ficha en RottenTomatoes (en inglés)
• Ficha en AllMovie (en inglés)