Ennistymon

Ennistymon

Inis Díomáin (ga)
Localización
52°56′N 9°17′O / 52.94, -9.29
Estado	Irlanda
Provincias	Munster
Condados	Condado de Clare
Identificador descritivo
Fuso horario	UTC±00:00

Ennistymon (en irlandés: Inis Díomáin^[1]), tamén escrito Ennistimon,^[1] é unha vila do condado de Clare que se atopa preto da costa oeste de Irlanda. En 2016 tiña unha poboación de 1 045 habitantes. Trátase dun popular destino turístico sendo famosas as fervenzas do río Inagh, que atravesa a localidade. Unha ponte que salva o río conduce á veciña Lahinch pola estrada secundaria N67, mentres que a N85 conecta con Ennis. A área foi oficialmente parte do Gaeltacht do oeste do condado de Clare até 1956.

Historicamente o nome da vila escribíase Inishdymon.^[1] Crese que derivou de Inis Díomáin, que significa "a illa de Díomáin".^[1] Porén, Míchéal Ó Raghallaigh argumenta que o nome provén de Inis Tí Méan, que significa "illa da casa do medio".^[2]

Debido á súa condición de "vila de mercado" (market town), en Ennistymon pódense encontrar supermercados, salón de peiteado, carnizarías, tendas de informática, copisterías, tinturarías, lavandarías, cafetarías e un hotel, así como numerosos bed and breakfast. Tamén hai moitos pubs nos que se interpreta música tradicional irlandesa.

Existen dúas liñas de Bus Éireann que dan servizo á vila: a 333 e a 350. A liña 350 conecta Ennistymon con Ennis, Lahinch, os cantís de Moher, Doolin (onde é posíbel tomar un transbordador para ir ás Oileáin Árann), Lisdoonvarna e Galway. A liña 333 permite ir a Kilfenora, Corofin, Miltown Malbay e Doonbeg.

O West Clare Railway adoitaba atravesar a vila, conectándoa con Ennis e as vilas costeiras do oeste do condado. A estación de tren de Ennistymon abriu o 2 de xullo de 1887 e pechou o 1 de febreiro de 1961.^[3]

Ennistymon posúe dúas escolas de educación primaria: Scoil Mhainchin/Ennistymon National School e Mol an Oige (escola Steiner).^[4] Mol an Oige Steiner National School converteuse recentemente na primeira escola de pedagoxía Steiner en Irlanda en obter o recoñecemento permanente como escola nacional polo departamento de educación do país.^[5] Scoil Mhainchin é o resultado da unión da CBS Primary School e The Convent of Mercy National School.

Tamén hai tres centros de educación secundaria na vila: Ennistymon CBS, a Vocational School e Scoil Mhuire.^[6][7][8] Existen plans para amalgamar estes tres institutos.^[9]

• As fervenzas de Ennistymon son unha atracción turística popular.
• O Falls Hotel (antigamente coñecido como Ennistymon House).
• O monumento en homenaxe ás vítimas da Gran Fame irlandesa. Foi erixido o 20 de agosto de 1995 cando cumpría o 150 aniversario da traxedia. Atópase fóra de Ennistymon na estrada que conecta con Lahinch.

• Pozzoleone, Italia
• Schimatari, Grecia

Wikimedia Commons ten máis contidos multimedia na categoría:  Ennistymon

• Historia de Ennistymon (en inglés)
• Información turística de Ennistymon (en inglés)