Bank of North Dakota

O Bank of North Dakota (BND), en galego Banco de Dacota do Norte, é unha institución financeira propiedade do estado de Dacota do Norte. Fundado en 1919 é o o único banco público dos Estados Unidos e ten a súa oficina principal en Bismarck, a capital do estado.

A principios do século XX, Dacota do Norte dependía dunha economía baseada na agricultura. Con todo, os labregos sufrían a que a especulación dos intermediarios e os caros empréstitos da banca, fundamentalmente dependente de zonas afastadas a Dacota do Norte como Minneapolis e Chicago^[1]. Así na década de 1910 artellaron un movemento reivindicativo co obxectivo de forzar ás institucións públicas a atender á problemática, a Non Partisan League.^[2] Esta formación gañou as eleccións estatais de 1918 e un ano máis tarde, co obxectivo de facilitar o crédito barato aos campesiños, creouse o Banco de Dacota do Norte, cun capital de 2 millóns de dólares^[1]. A conexión entre os líderes da Non Partisan League e os socialistas americanos fixo que, no momento do seu nacemento, o Banco de Dacota do Norte fose atacado por algúns sectores por consideralo propio do comunismo ou antipatriotico, mais as autoridades do estado mantiveron a institución^[3].

O Banco de Dacota do Norte recibe como depósitos o conxunto do recadado polas taxas e impostos recibidos polo estado^[4]. Debe contribuír o desenvolvemento agrario, comercial e industrial de Dacota do Norte polo que opta por cobrar xuros máis reducidos ás pemes ou facilitar os créditos para os estudantes universitarios. Ademais, o Banco de Dacota do Norte entrega os seus beneficios ao estado para financiar programas especiais. Calcúlase que dende 1945 o Banco achegou máis de mil millóns de doláres do seu lucro a Dacota do Norte^[5].

No contexto da crise económica e financeira que se prolongou de 2007 e 2013, dende distintos sectores louvouse o Banco de Dacota do Norte como un exemplo modélico de banco público^[6][7] espertando o interese doutros estados dos Estados Unidos que exploraron a posibilidade de crear institucións semellantes^[8].

1. ↑ ^{1,0 1,1} "History of BND". Bank of North Dakota (en inglés). Consultado o 2021-04-13. ^{[Ligazón morta]}
2. ↑ "Origins of the Non Partisan League". STATE HISTORICAL SOCIETY OF NORTH DAKOTA. Consultado o 13-4-2021. 
3. ↑ Hertz, Darren. "Defending the Bank of North Dakota". The BND Story (en inglés). Consultado o 2021-04-13. 
4. ↑ "Dakota do Norte: petróleo e banco público". Página22 (en portugués). 2011-10-07. Consultado o 2021-04-13. 
5. ↑ Hertz, Darren. "First Transfer to General Fund". The BND Story (en inglés). Consultado o 2021-04-13. 
6. ↑ "La banca pública que no existe en Europa". Economistas frente la Crisis. Consultado o 13-4-2021. 
7. ↑ Harkinson, Josh. "How the Nation’s Only State-Owned Bank Became the Envy of Wall Street". Mother Jones (en inglés). Consultado o 2021-04-13. 
8. ↑ Boston, Federal Reserve Bank of (2011-09-26). "The Bank of North Dakota: A Model for Massachusetts and Other States?". Federal Reserve Bank of Boston (en inglés). Consultado o 2021-04-13. 

• Páxina web do Banco de Dacota do Norte (en inglés)
• Web sobre o centenario do Banco de Dacota do Norte (en inglés)