Sisene

Luci Corneli Sisene (par latin Lucius Cornelius Sisenna; prin dal 117 p.d.C. - 67 p.d.C.) al fo un scritôr, storic, gjenerâl e politic roman antîc.

Nassût tal 118 p.d.C. o pôc prime, al fo pretôr tal 78 p.d.C. e po forsit propretôr in Sicilie. Fo ancje avocat e, dopo vê scombatût par Sile, comandà legions sot Pompeu: i le daûr cuant che al veve di scombati i pirats e po, stant che a podevin vignî fûr bataicis a Crete fra il so gjenerâl e Quint Cecili Metel Cretic, al spesseà a cori te isole, là che in curt al murì di malatie; al jere il 67.

Al scrivè un libri di Historiae (Storiis), che a tratavin la storie di Rome de distruzion di Troie in ca, corint tal antîc e vignint plui minûts tai acjadiments plui resints; sedi Ciceron che Salusti, che forsit lu cjapà ancje a model, comendarin il so lavôr di storic, fat intun periodi che si tornave a scrivi di storie come i antîcs (vadì contant dut dal principi di Rome, e cence cori come al veve fat Sisene, e vitant cun dute atenzion di passâ pal crivel lis informazions di meti dentri), ma lu remenarin ben pe sô partisanerie (i plaseve Sile e lu si viodeve); Ciceron nol sierà un voli nancje su la sô manie di parâ dentri de sô prose piligrinis preciosetâts lenghistichis. Al metè dentri ancje contis maraveosis, come che al veve fat Celi Antipatri, che di lui al cjapà inspirazion. Pal gust pes robis fantastics, i tirà ancje la gole di voltâ par latin lis Istoriis milesiis di Aristide e par rindi il pevelât realisim dal originâl al doprà un misturot di maniere di lenghe vulgâr e arcaiche, segnant un antecedent par Varon cu lis sôs Menipeis e par lis Metamorfosis di Apulei; e vignì fûr la prime opare di narative di dute la leterature latine.

• Paolo Fedeli, Storia letteraria di Roma, Napoli, Ferraro, 2004
• Ettore Paratore, Storia della letteratura latina, Bologne, Sansoni, 1957

• Sisenna, treccani.it