Lucrezi

Tît Lucrezi Câr (par latin Titus Lucretius Carus; 98/94 p.d.C. - 55/51 p.d.) fo un poete e filosof roman antîc.

De vite di Lucrezi o savin pôc. San Jeroni stramande che, deventât mat par vie di un bevarin d'amôr, al poetave dome tai salustris di luciditât e in code si copà, a corantecuatri agns, ma a son dutis istoriis, probabilmentri vignudis fûr pe descrizion dal delîr d'amôr che si cjate tal De rerum natura, il so poem, pe ostilitât dal ambient cristian e par confusie cun Luci Licini Lucul, che si diseve che al fos lât vie di cjâf ancje lui e po si fos copât e lu si breveave in Luc., compagn di Lucrezi. Dai contemporaneis nissun fevele di lui, gjavât fûr Ciceron, che seont Sant Jeroni al emendà e butà fûr l'edizion dal De rerum natura; bisugne dî che Ciceron nol preseave un fregul l'epicureisim, la filosofie di Lucrezi e dal so poem, e che tai bocons là che al dà cuintri chê scuele nol tire mai fûr Lucrezi, che però al menzone intune letare al fradi, Quint, fasint capî che lu vevin let ducjidoi. Ancje se no lu menzonin mai, o sin sigûrs che lu leierin ancje Virgili e Orazi, par vie di alusions e di claris inspirazions. Cence contâ Ciceron, par cjatâ un che 'nd' feveli diretementri bisugne spietâ Ovidi.

Tal innomenât poem De rerum natura (Su la nature des robis), la uniche che o savìn che al scrivè, si cjate dute la filosofie di Lucrezi, che al jere un ferbit partidant di Epicûr, che 'nd' voleve divulgâ dut il so pinsîr, par spandi il sintiment pes ments e sfrancjâlis des cjadenis des antighis dogmatichis bausiis de superstizion. Bisugne dî che Epicûr nol veve stime de poesie, che e pò imbroiâ e imberdeâ i spirts te lôr ricercje de cuiete (la atarassìe), ma Lucrezi doprave i viers come mieç par fâ rivâ il messaç a plui letôrs che al podeve e spandila savietât epicuree il plui pussibil, come, al scrivè, cuant che i miedis sparpagnin mîl tal lavri di une scudiele, dimût che il frut malât si supi dute la medisine cence fâle masse lungje. Cun Epicûr e la sô vision razionalistiche al è simpri d'acuart e, come lui, convint che l'omp nol varès di vê pôre de muart, parcè che adun cul cuarp e passe ancje la anime e partant cuant che e rive la muart noaltris, scletementri, no o sin plui e e je une robe che no nus rivuarde, ma si vise ben che l'ingôs pe muart ven fûr propite de percezion de fin. Difat, se a Epicûr al è fidêl te dotrine, o podarìn dî che lu tradìs tai rifles de poesie, là che al somee bandonâ il vivi razionâl e intransigent dal mestri e si dismole aes seduzions des passions, che di lôr si ingusiave propite biel che al predicjave il so ideâl di vite razionâl e judiziôs. Cundifat nol rive a sfrancjâsi dal lancûr de muart, alternant moments là che al gjolt dal spirt de nature, che lu inevree di fuarce vitâl, a altris di un invincibil e fondât pessimisim, come chel di Leopardi.

In rivuart al stîl, al messede peraulis cuotidianis e neologisims e elements antîcs, come mûts di declinâ lâts in vieri e cetantis aliterazions, metint su une lenghe che e rivi a a jessi unevore espressive, sedi tes imaginis che al depenç sedi là che al vûl trasmeti ai letôrs il so entusiasim filosofic, cuntun risultât compagn al primitivisim di Dante, ma al sta simpri ben atent al rigôr de esposizion, cence mai desmenteâ che il finâl de sô opare al è prin di dut chel didascalic, di difindi e difondi l'epicureisim come la plui judiziose des filosofiis; difat al dopre formulis tipichis de argumentazion. Al scrivè di vê fastidis cu la lenghe, stant che di filosofie par latin si veve scrit propite pôc e che si veve doprât simpri il grêc e duncje i mancjave il lessic just; dut câs no si adatà a cjapâ su peraulis dal grêc, ma al lave indenant a fuarce di inventânt di gnovis e di zîrs di peraulis.

• Paolo Fedeli, Storia letteraria di Roma, Napoli, Ferraro, 2004
• Ettore Paratore, Storia della letteratura latina, Bologne, Sansoni, 1957

• Lucrezio, treccani.it