Trecel Devisión Española

La Trecel devisión es la cuarta categoria el fubu español. Es la devisión enmeyaenti enferiol a la Segundera Devisión B Española i poncima las devisionis rehionalis, polo qu'está arrepará cumu la úrtima categoria nacional d'España. Hue criá en 1929 i es una categoria nu profisional.

La Trecel Devisión se crió la tempurá 1929/30, es izil, endi la segundera eición la Liga española e fubu. Estóricaenti la Trecel Devisión era la trecel categoria la liga española, pombahu la Segundera Devisión. La tempurá 1977/78, se crió la Segundera Devisión B i la Trecel Devisión se gorvió la cuarta categoria nacional.

La su horma, el númiru e grupus i los equipus praticipantis á cambeau en albondas vezis ena estória.

Ena su primel eición, la primel fasi tinia a 33 equipus en 8 grupus deferentis. Entri los 8 campionis hugun eliminatórias i el Castellón se gorvió nel primel campión de la categoria.

Angañu hugan 364 clus ena Trecel Devisión, deviius en 18 grupus, ena huerça los cualis áin 20 equipus. Cá grupu preteneci pa una federación territorial i polo tantu, pa una comuniá autónoma, acetu nel chascu d'Andalucia, qu'está deviia en dos partis. Los clus la ciais autónomas de Ceuta i Melilla están assitiaus enos grupus de la Federación Andaluça.

Velaquí la destribución heográfica de los grupus:

• Grupo 1 - Galícia
• Grupo 2 - Astúrias
• Grupo 3 - Cantábria
• Grupo 4 - Pais Vascu
• Grupo 5 - Cataluña
• Grupo 6 - Comuniá Valenciana
• Grupo 7 - Comuniá de Madril
• Grupo 8 - Castilla i Lión
• Grupo 9 - Andalucia Oriental (Províncias d'Almeria, Graná, Haén, Málaga i Melilla).
• Grupo 10 - Andalucia Ociental (Províncias de Cadis, Córdoba, Uerva, Sevilla i Ceuta).
• Grupo 11 - Ilas Balearis
• Grupo 12 - Ilas Canárias
• Grupo 13 - Rehión de Múrcia
• Grupu 14 - Estremaura
• Grupo 15 - Navarra
• Grupo 16 - La Rioha
• Grupo 17 - Aragón
• Grupo 18 - Castilla-La Mancha

El sistema e competición es el mesmu qu'el restu categorias del fubu español. Se huga cá añu, encetandu al final d'Agostu u prencípius de Setiembri hata Mayu u Húniu el añu desotru.

Los equipus de cá grupu hugan tós contra tós en dos güertas, una vezi en campu própiu i algotra nel contráriu, hata sumal 38 hornás. El ordin los partius se decii al prencípiu cun sorteu. El ganaol dun partiu tini 3 puntus, el perdeol dengunu i nel chascu d'igualdá un puntu pa cá unu.

Al acabihal la tempurá el equipu con mas puntus es el campión de la Trecel Devisión (áin 18 campionis en cá tempurá, unu pa cá grupu).

Los cuatru cabecerus de cá grupu tinin derechu a hugal la fase d'arcensu pala Segundera Devisión B. Pol sorteu, se cuaharingan 18 grupus de 4 equipus, peru en cá unu nu puei abel equipus del mesmu grupu orihinal i tini c'abel un primel, segunderu, trecel i cuartu crasificaus.

En cá unu d'estus 18 grupus s'enfrontilan los equipus en dobri partiu. El que hue primel crasificau contra el cuartu i el segunderu contra el treceru. Los ganaoris s'enfrontilan entri ellus, i los 18 ganaoris arciendin.

Ena huerça los grupus, los úrtimus 3 crasificaus deciendin palas devisionis rehionalis. Enos grupus 6, 12 i 17 deciendin los cuatru úrtimus, mentris qu'en el grupu 7 bahan los cincu pioris.

Si alogu conocelsi los arcensus i decensus un grupu se quea con mas de 20 equipus, las federacionis podrán estrabrecel decensus adicionalis pa qu'el númiru equipus se quei entri 20 i 22.

Sin embalgu, si un grupu se quea con menus de 20 equipus, la federación territorial puerie echal patrás los decensus u bien, el arcensu de nuevus equipus.