Gestalt
Gestalt psikologiako eskola da, fenomenoak antolamendu jakin bat duten osotasun gisa aztertzen dituena. Eskola horren arabera, osotasun egituratu baten esanahia ez dute ematen haren elementu osagarriek; hala, irudi marraztu batek badu esanahirik, marrazkian zuloak badira ere. 1912an sortu zuten Max Wertheimer, Kurt Koffka eta Wolfgang Köhler alemaniarrek; 1930. urte inguruan Estatu Batuetara eraman zuten erbesteratu alemaniarrek. Han indartu zen, analisiaren ikuspuntu zientifikoaren aurka, analisi-mota horrek giza balioak baztertzen dituelakoan. Gestalt terapiak psikoanalisiaren eta filosofia existentzialistaren baliabide batzuk erabiltzen ditu, baina orainaldiko bizikizunak aztertzen ditu, iraganak baino areago. Eredu edo egitura sortu berriak (gestalten) azpimarratuz, bizikizun osorik berrien erdigune bihur daitezkeenak, gaixoaren ohiko jokabidea eta erantzunak aldatzen saiatzen da. Hitzezko ez diren jokabide-alderdiak asko aztertu ditu Gestaltak.
Erreferentziak
[aldatu | aldatu iturburu kodea]- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.
