Intervista col vampiro
|
C'l artìcul chè 'l è scrit in
Miranduléś |
 Interview with the Vampire:The Vampire Chronicles | ||
| Intervista col vampiro | ||
 Tom Cruise e Brad Pitt in na figùra dal film | ||
| Intervìsta c'n al vampîr 1997 | ||
|---|---|---|
| Regìa: Neil Jordan | ||
| Scritōr: Anne Rice | ||
| Atōr: Tom Cruise • Brad Pitt • Kirsten Dunst Antonio Banderas • Christian Slater • Indra Ové Stephen Rea • Sarah Stockbridge • Mike Seelig Domiziana Giordano • Lee E. Scharfstein John McConnell • Bellina Logan • Marcel Iures | ||
| Müsica: Elliot Goldenthal | ||
| Léngua: Ingléś • Francéś | ||
| Dürä dal film: 118 minüt | ||
| Nasiōṅ: Stat Unî | ||
Intervista col vampiro (Intervìsta c'n al vampîr) 'l è 'n film ad scarésa dal 1997 ad Neil Jordan trat da 'l rumànś umònim dl'Anne Rice. 'L è stâ numinâ par dū Prèmi Òscar, par la culòna sunóra e per la senugrafìa. Par la part ad Daniel Malloy a s éra sarnî River Phoenix ma 'l atōr 'l è pò mòrt soquànt dè dòp ch'i ìvan tacâ a giràr.
Custàda ssanta migliòṅ ad dòlar, la pelìcula la 'n à pò muciâ sù da piò ad duśènt-vint-a-tri. In dal film i Guns N' Roses i càntan Sympathy for the Devil, cover di Rolling Stones.
Sunt
Louis de Pointe du Lac (Brad Pitt) al vèṅ intervistâ a San Francisco p'r al giurnalìsta Daniel Malloy (Christian Slater). Louis al taca a cuntàr la sò vita, dgénd ch'al pōl scampàr par sèmpar, esénd lò 'n vampîr, ma anc ch'a n è minga fàcil purtàr avànti la sò cunsidiòṅ.
In dal 1791 lò 'l éra pîṅ ad bèsi ch'al gh'iva di sit a New Orleans. Dòp la mòrt ad sò mujér e ad sò fiōl, a n gh in fargàva più gnint dla vita. 'L è a cal punt lè ch'al vampîr Lestat de Lioncourt (Tom Cruise), vlénd avér-ag 'n amìg, al decìd ad far-al dvintàr cuma lò ma mèntar lò 'l è sénsa cōr e 'l è bòṅ ad masàr sénsa scrùpui, Louis al fà fadìga a tgnir a drē a qvél ch'l è dvintâ. Piutòst che tōr la vita a i óm par bév'r-an 'l sangṿ, al sarnìs di sórag o da gl'atri bèsti parchè ad dèntar al s sènt incóra umàṅ.
Na nòt, mént'r al s cata p'r al stradi 'd un quartēr in du la gint la patìs la pèsta, al véd na putìna ciamàda Claudia (Kirsten Dunst) ch'la piànś davśèṅ a 'l cadàv'r ad sò màdar. Sénsa vlér-al dabòṅ dal tut, Louis al gh dà 'n murśgòt ciuciànd-ag via dagnóra tut al sò sangṿ tant ch'la baghéta la và in a risć ad murìr. Scampàda a la mòrt, anc lì lē la dvènta na vampìra e la vèṅ adutàda par Lestat e Louis. La Claudia la sumìlia dimóndi a Lestat parchè la tîṅ a drē a tut qvél ch'al gh diś e pò parchè la gh cata gust a cupàr al parsòni par scampàr lē.
Trént'an dòp la Claudia, vdénd al còrp dna dóna cavàda śò da 'd là da na fnèstra, la dmanda a i sò genitōr adutìṿ quànd è ch'la dvintarà granda anca lē ma i dū i gh rispóndan ch'i vampîr i n pōlan minga dvintàr vèć e che lē l'è destinàda a 'rmàgnar acsè par sèmpar. La putìna, ch'la vōl bèṅ a Louis, la s mét in dla suca ad masàr Lestat.