Messicu

U Messicu hè un statu di l'America settentriunale. A so superficia hè 1.964.375 km². Sparte cunfine cù i Stati Uniti d'America à u Nordu (3 152 km), u Guatemala (193 km) è u Belize (956 km) à u Sudeste. A u livanti, ci hè u golfu di u Messicu è à u punenti l'uceanu Pacificu.

 

Due principale catene muntagnose attraversanu u Messicu: a sierra Madre occidentale è a sierra Madre orientale. A Sierra Madre occidentale, à u punenti, hè l'estensione di a Sierra Nevada di California è a Sierra Madre orientale, à u livanti, hè l'estensione di e Muntagne rocciose di u Novu Messicu è di u Texas. U Messicu pussede ancu altre catene muntagnose cumè a catena californiana, a sierra Madre del Sur, a sierra Madre de Oaxaca, a sierra Madre de Chiapas è a Meseta Central de Chiapas. À u centru di u paese, ci sò parechji piani. Parechje cità so situate sopra sti piani, cumè a Cità di Messicu, Guadalajara, o ancu Puebla.

 

Ci sò parechji munti incù un altitudine superiore à 5.000 metri. U Messicu, ind'a più maiò parte, hè un paese muntagnolu è vulcanicu. Parechji monti sò vulcani. U Citlaltépetl (ò Picu di Orizaba) hè u più altu monte di u Messicu, cù 5.636 metri d'altitudine. Hè situatu in u Statu di Veracruz, in a Sierra de Oaxaca. U Popocatépetl hè u secondu più altu monte, cù 5.426 metri. Stu monte hè situatu versu a Cità di u Messicu, sopra a fruntiera trà i Stati di Messicu è di Puebla. Ci hè dopu u monte Iztaccíhuatl (cù 5.215 metri).

 

Cù a so taglia è a so superficia, u Messicu pussede parechji climi sfarenti trà e regione. À u Nordu, i climi priduminanti sò u clima aridu, u clima semi-aridu è u clima diserticu. A Bassa-California (sopratuttu à u Sudu di a penisula) hè una di e regione e più aride di u Messicu. In e zone muntagnose, principalmente à u centru di u paese, u clima hè ghjiniralmente più dulce: uceanicu in altitudine ò subtrupicale in qualchì lochi. Per esempiu, a Cità di Messicu pussede un clima subtrupicale (uceanicu sicondu certi climatologhi) cù 18°C di timperatura media, una staggione secca è una staggione ùmida. U Sudu è a maghjurità di e zone costere anu un clima trupicale, cù friquintamente due staggione (secca è ùmida) è timperature guasgi sempre superiore à 20°C. Una parte chjucca di u Nordu di u Messicu hà un clima mediterraniu, per esempiu in a cità di Tijuana.

Rapportu climaticu di Merida (Yucatan, clima trupicale):

 

Rapportu climaticu di La Paz, Bassa-California di u Sudu (clima aridu):

 

 

U Messicu hè unu di i 17 paesi megadiversi identificati in lugliu di u 2000 da u Programma Ambientale di e Nazione Unite. Più di 200.000 spezie sò prisente in u Messicu è ci sò ancu qualchì spezie endemiche. Hè u primu paese di u mondu in numeru di spezie sfarente di rettili, cù più di 707 spezie. U Messicu hè u secondu paese di u mondu in numeru d'ecosistemi è u quartu in numeru tutale di spezie. Oghji, più di 2.500 spezie sò ufficialmente prutette da a leghje messicana è 170.000 km² sò cunsiderati cumè spazii naturali prutetti.^[2] Ci sò 67 parchi naziunali in u paese.

Oghje, una parte impurtante di a biudiversità messicana hè minacciata da a difurestazione, principalmenti à u Sudu è in e zone trupicale, per esempiu in u Statu di u Chiapas. E fureste sò spessu brusgiate in parte per l'agricultura. U Chiapas hà persu cusì 320,809 ettari di furesta trà u 2001 è u 2018.^[3]

 

 

U Messicu pussede parechji fiumi ma pocu sò navigabili. I più famosi sò certameinti u río Bravo del norte, u río Grijalva, u río Usumacinta, o ancu u río Balsas. U Río Bravo del norte hè u nome messicanu di u fiume chì cunfina in parte u Messicu cù i Stati Uniti. Stu fiume hè chjamatu Río Grande in i Stati Uniti.^[4] In e regione chì pussedenu due staggione (una secca è una ùmeda), a taglia di i fiumi pò scambià sicondu u periodu di l'annu.

Cù i numerosi climi chì pussede u Messicu, a dispunibilità in acqua scambia trà e regione. I Stati di u nordu anu ghjeneralmente pocu acqua, è u sudu, trupicale in a so maiò parte, ne pussede asssai.

U Yucatàn, peninsula situata à u sudeste di u Messicu, pussede un clima trupicale di savanna. Hè un tarritoriu pianu è i fiumi sò guasgì inesistenti. A ricca furesta trupicale prisente nantu à sta peninsula pò campa grazie à quachì numerosi pozzi sutterranii, chjamati cenotes in spagnolu. I cenotes tenenu assai acqua tuttu l'annu è ponu cusì annacquà a furesta sottu à a terra.

 

A pupulazione di u Messicu hè di 129.875.529 abitanti in u 2023, cù una densità di pupulazione di 61 abitanti per km². 78% di a pupulazione campa in cità in u 2010. A zona metrupulitana di Cità di u Messicu pussede una pupulazione di 20 892 724 abitanti (in u 2015).

 

U Messicu hè un paese chì pussede una cultura ricca è variata. Hè u risultatu d'una mistura trà e sfarente culture preculumbiane (ci sò più di 68 populi indigeni) è a cultura aurupeana, più particularmente spagnola, purtata da a culunisazione. Pudemu vede stu michju è ste sfarente influenze in l'architettura, a gastronomia, e tradizione, e celebrazione, a rilighjione, a musica o ancu in a lingua.

 

A musica messicana hè ricca, cù parechji stili sfarenti influenzati da e tradizione o da u folclore. U Messicu hà avutu grandi sviluppi musicali principalmente sti ultimi decennii. I Mariachi (Mariachis in spagnolu) sò i musicanti ghjuchendu in un tipu di furmazione musicale tipica di a cultura, di l'identità è sopratuttu di a musica messicana. Dapoi u 2011, i Mariachi sò iscritti in a lista riprisintativa di u patrimoniu culturale immateriale di l'umanità. Ghjiniralmente, un gruppu di Mariachi tradiziunale hè cumpostu da due trumbette, due o quatru viulini, una vihuela, una o quatru ghitarre è un guiratón (un strumentu tipicu messicanu).

 

A religione priduminante in u Messicu hè a religione cattolica. Sta religione fù purtata da i coloni auropei è spagnoli è fù ghjiniralmente imposta à e populazione lucale. Oghji, ufficialmente, u Messicu hè un statu laicu. A religione cattolica hè assai prisente in a cultura messicana, per esempiu in a musica o l'architettura.

 

A cucina messicana hè ricunnisciuta cum'è Patrimoniu culturale immateriale di l'Umanità per l'UNESCO dapoi u 2010. A gastronomia messicana hè ricca per a so diversità: ogni regione di u paese pussede e so ricette tradiziunale è dunque a so propria cucina. Hè un mischju trà a gastronomia preculumbiana è a cucina spagnola. A maiò parte di l'ingredienti prisenti in a gastronomia messicana sò urighjinarii di u cuntinente americanu, cum'è a pumata, i fasgioli neri, l'avucati, u caccao, a vaniglia o ancu u pivaronu, ma ci sò ancu parechji prudutti vegetali o animali impurtati da u cuntinente auropeu (per esempiu u granu, u zuccaru, l'agrumi, u risu, a carne di porcu o di boiu è u pulletsru). Stu mischju d'ingredienti è di tecniche gastronomiche trà i due cuntinenti è e due civilisazione hà pruvucatu a nascita d'una nova gastronomia.^[5] È cusì sò nati u guacamole, u pozole o i tamales, per esempiu.

E banchjere messicane e più famose sò certameinte u taco, a quesadilla, a tortilla o ancu u tamal.

E bivende messicane sò numerose. A tequila, una bivenda alculizata, si face grazie à a distillazione di l'agave turchina, una pianta urighjinaria di u Messicu.

I Stati Uniti messicani sò una Ripublica federale cù sistema presidenziale. U presidente hè elettu per un mandatu di 6 anni, ma ne pò fà solu unu. Attualmente, a presidente hè Claudia Sheinbaum (partitu MORENA), dapoi u 1^u d'uttrovi di u 2024. Hè a prima donna presidente di u Messicu.

 

Ci sò 31 Stati. A capitale, Cità di Messicu, ùn hè micca un Statu è micca una cità sicondu a custituzione messicana.^[1] Ci sò dunque 32 entità federative in tutale. Ogni Statu pussede a so custituzione.

• Cità di u Messicu
• Guadalajara
• Lila Downs

1. ↑ ^{1,0 1,1} Custituzione messicana (in spagnolu)
2. ↑ Comisión Nacional para el Conocimiento y el Uso de la Biodiversidad, Gobierno de México (in spagnolu)
3. ↑ Comisión Nacional Forestal PDF (in spagnolu)
4. ↑ Río Grande o Río Bravo, El Tiempo (in spagnolu)
5. ↑ Gastronomia messicana: Patrimoniu culturale immateriale di l'Umanità, Fundación UNAM (in spagnolu)