Gabbianu corsu

	U gabbianu corsu

Larus audouinii

Classificazione scentifica

Regnu

Animalia

Divisione

Chordata

Classa

Aves

Ordine

Charadriiformes

Famiglia

Laridae

Generu

Larus

Nome binuminale

Larus audouinii
Payraudeau, 1826

U Gabbianu corsu (Larus audouinii) hè un acellu chì face parte di a famiglia di i Laridae. A scuperta scentifica di u gabbianu corsu hè stata fatta per a prima volta in Corsica, in 1826, in u golfu di Vintilegne è in l'isulotti Bruzzi, da Charles Payraudeau. U nome latinu Larus audouinii hè statu datu in onore di u naturalistu francese Jean Victoire Audouin. U gabbianu corsu hè un acellu marinu, chì ùn friquenta ch'è u litturale è l'isulotti. À i ghjorni d'oghje, a populazione mundiale hè stimata à circa 20 000 coppii, tutti situati in l'areale di u Mare Terraniu. A populazione più impurtante si trova in Spagna, in u delta di l'Ebru. In la rigione di Catalogna, ci hè circa 16000 coppii. In u sessanta invece, a populazione mundiale tutale era stimata à 2000 coppii, è 'ssa spezia era tandu in traccia di sparisce.

U gabbianu corsu hè longu 45-55 cm. A so apertura alare hè 115-145 cm. Pesa da 600 à 800 grammi. A cuvata di u gabbianu corsu hè di dui o trè ovi, d'aprile o di maghju. I piulaconi sò allevati dopu durente 5 simane.

U gabbianu corsu pò essa cunfusu incù l'acula marina cumuna. Ma ci sò e differenze trà e dui spezie: u gabbianu corsu hè bizzichirossa, invece l'acula marina cumuna hè bizzichigialla. U gabbianu corsu hè dinù più chjuca è e so ale sò più strette ch'è quelle di l'acula marina cumuna. Infine, e patte di u gabbianu corsu sò grisge-verde, quand'elle sò gialle ind'è l'acula marina cumuna.

U gabbianu corsu manghja picculi pesci. Accade ancu ch'ella catturessi insetti maiori. Ma ùn friquenta micca i rumenzulaghji, cum'ella face l'acula marina cumuna.

Prutezzione

U gabbianu corsu hè un acellu schersissimu è minacciatu di sparizione, ancu s'è a populazione mundiale tutale hà crisciutu un pocu 'ssi ultimi anni. Hè scrittu annantu à a Lista Rossa di e spezie minacciate di l'IUCN. Hè prutetta da:

a Cunvenzione di Berna : annessu II
a Cunvinzione di Bonn : Annessu I
a Cunvinzione di Barcilona: Annessu II du u protocollu

In Corsica

U gabbianu corsu hè prisente in Corsica. Si stima ch'ellu ci hè un centu di coppii in Corsica. 'Sse populazione sò in Aiacciu in Asprettu, annantu à parechji isulotti cum'è Finuchjarola, a Giraglia è Capense, i Lavezzi è e Cerbicale. A culonia di gabbiani corsi di u Capicorsu hè rimarchevule, è per via di quessa, l'isulotti Finuchjarola anu ottinutu u statutu di Riserva naturale. Difatti, u gabbianu corsu hè diventatu unu di i simbuli di u Capicorsu.

E minacce per a populazione di l'isula di gabbianu corsu venenu in particulare di l'accriscimentu recente di a populazione d'acule marine cumune. Difatti, u gabbianu corsu soffre di 'ssa abundenza d'acule marine cumune, perchè li pò manghjà i so ovi o i so piulaconi, ma li pì dinù catturà e so prede. Un' antra minaccia per u gabbianu corsu, vene da a ghjente chì sbarcanu annantu à i siti ind'ellu hè arrighjunatu, ancu quand'ellu hè difesu. Chì hè impurtante chì 'ssi acelli ùn fussini micca diranghjati, perchè accade chì tandu, l'adulti fughjenu da u nidu, lascendu i so piulaconi soli, chì ponu tandu esse catturati da i so predatori.

Lessicu

U gabbianu corsu hè ancu chjamatu l'acula marina corsa.

Da vede dinù

Referenze

Thibault, Jean-Claude, Acelli di Corsica - Les oiseaux de Corse, 1983, PRNC (in francese)
L'acula marina corsa Archiviu 2008-09-07 at the Wayback Machine

Ligami

Lessicu - L'acelli, Adecec
Articulu annantu à l'acula marina cumuna è l'acula marina corsa in Corse-matin Archiviu 2009-03-05 at the Wayback Machine