Uranus (simbol: ; baasal matan ngaran Latin Ūranus gasan ngaran diwa Yunani Οὐρανός) adalah palanit kapitu matan Matahari. Uranus adalah palanit nang baisi jariji pangganalnya katalu sakaligus massa pangganalnya kaampat di Tata Surya. Uranus jua adalah sabubutingannya palanit nang ngarannya baasal matan tukuh dalam mitulugi Yunani, matan pirsi Latinisasi ngaran diwa langit Yunani Ouranos. Kumpusisi Uranus sarupa lawan Neptunus, wan kaduanya baisi kumpusisi kimiawi mang lain matan raksasa gas nang taganal, Jupiter wan Saturnus. Marganya, bubuhan astrunum rancak maandak Uranus wan Neptunus dalam katiguri "raksasa is" gasan malainakan kaduanya matan raksasa gas. Atmuspir Uranus sarupa lawan Jupiter wan Saturnus marga tianan tatambaiannya adalah hidrogen wan helium, tagal manian tabanyak unsur "is" kaya banyu, amonia wan metana, baimbai lawan sisa hidrokarbon. Atmuspir Uranus adalah atmuspir palanit pandinginnya di Tata Surya, lawan suhu parandahnya mancapai 49 K (−224 °C; −371 °F). Atmuspir Uranus baisi satruktur awan balapis-lapis wan kumpliks, wan jua dikikiraakan lapisan awan parandahnya tadiri atas banyu wan lapisan awan paningginya tadiri atas metana. Palihan dalam Uranus sapalihan ganal tadiri atas is wan babatuan.
