Sundel Bolong

Sundel bolong (hurup Arab gundul: سوندل بولڠ) atawa sendal bolong ya'entu tahayul sétan deri Nusantara nyang wujudnya wadon nyang geulis, rambutnya panjang, èn paké gaon putih, cuman belakangnya atawa gegernya makanya jeroannya keliatan. Orang-orang banyak nyang nyama-nyamain kuntilanak ama sundel bolong cuman gegara tahayulnya èn wujudnya. Nyang ngebédain entu sundel bolong ada punya bolongan digegernya. Sundel bolong juga jadi tahayul di negeri jiran lantaran diceritain ama orang endonan.^[1]

Nama "sundel bolong" deri lafat orang Nusantara bakal setilah ""sundal bolong". "Sundal" artinya tuh "pèrèk" atawa "cabo" èn "bolong" artinya "lobang tembus ke jero badan" nyang wujudin enni sétan.

Kalo ngikutin tahayul Nusantara, sétan sundel bolong entu arwah penasaran lantaran ada wadon nyang mati gegara dipaké èn beranak di dalem kubur. Sundel bolong juga bawa orog-orog nyang baru diberojolin, Sundel bolong malu ama bolongan nyang ada di belakang gegernya, makanya dia terus-terusan bakal nutupin entu bolongan.

Sundel bolong sering sekali berobah jadi wadon geulis nyang ngalor-ngidul sendèwèkan di jalan nyang sepi. Ada omongan kalo enni tahayul dibikin èn ditoain di Nusantara bakal ngeja wadon-wadon kaga' ngalor-ngidul sendèwèkan malem-malem. Soalnya ada banyak lanang-lanang jahat nyang bakal maké enni wadon kalo bader kuar malem-malem.

Sundel bolong entu banyak dijadiin pèlem sétan di Indonésia, apalagi taon 80-an nyang dilakonin ama Suzanna. Banyak pèlem sétan di Indonésia nyang maké sundel bolong jadi ceritanya. Cuman nyang dianggep bekèn entu pèlem Sundelbolong (1981) deri Rapi Films. Pèlem laènnya nyang juga maké tahayul sundel bolong juga nginclo' abis kebekènan entu pèlem, conto:

• Telaga Angker - dibintangin Suzanna (1984)
• Malam Jumat Kliwon - dibintangin Suzanna (1986)
• Malam Satu Suro - dibintangin Suzanna (1988)
• Legenda Sundel Bolong (2007)

1. ↑ Orang endonan (hurup Arab gundul: اورڠ اندونن) - (Ind.) imigran, pendatang; (Ing.) immigrant