Dus-dusan (bola tendang)

Dus-dusan^[1] (hurup Arab Gundul: دوس٢ن; Inggris: penalty shoot-out) atawa tos-tosan^[2] (hurup Arab Gundul: توس٢ن) dalem gerak badan bola tendang entu atu cara bakal nyabitin sapa nyang menang kalo itu tim dua pada seri baé golnya.

Kalo abisnya 90 menit masing juga' seri, biasanya tim pada diadu lagi tambahan waktu 30 menit dalem dua babak. Kalo masing juga' seri, baru dah tu pada dus-dusan. Biasanya, saban tim dapet jatah tendangan 12-pas lima kali, èn nyang paling banyak ngejebolin dia nyang menang. Poko'nya kalo masing juga' seri abisnya ni nendang tendangan 12-pas, saban tim dapet lagi barang atu-atu tendangan 12-pas entuk ada atu nyang menang.

Galibnya mah, dus-dusan ada dipaké kapan di tanding-tanding bèker doang, bukan di tanding-tanding liga. Kalo kaga' nyang menang di tanding liga, itu tim dua-duanya tetep sorang 1 ponten. Nah kalo di tanding bèker pan orang mah butuh ada nyang menang atu biji, mangkanya kudu'ada dah tu sabitan sapa nyang menang, salah atunya liwat ni dus-dusan.

Lah, gènèngan mah banyak tanding pinal bèker nyang menangnya liwat dus-dusan, kaya' Bèker Dunia 2006 punya pinal, Liga Kampiun UEFA 2005 punya pinal, ama Bèker Dunia 1994 punya pinal.

1. ↑ Saidi, Ridwan. (2007). Glosari Betawi: Kamus kata-kata, nama, dan peristiwa dari zaman prasejarah hingga zaman moderen. Betawi Ngeriung.
2. ↑ Saidi, Ridwan. (2007). Glosari Betawi: Kamus kata-kata, nama, dan peristiwa dari zaman prasejarah hingga zaman moderen. Betawi Ngeriung.