Фрэоны

Фрэоны або хладоны — тэхнічная назва насычаных фторзмяшчальных вуглевадародаў (некаторыя змяшчаюць таксама атамы хлору і брому).

Вырабляюць фтарыраваннем хлор- ці бромпарафінаў фторам, фтарыдамі металаў і інш. У сувязі з уплывам на стратасферны азон прамысловая вытворчасць некаторых фрэонаў забаронена або абмежавана.

Выкарыстоўваюцца як холадагенты ў халадзільных агрэгатах, прапеленты для аэразоляў, пораўтваральнікі ў вытворчасці пенапластаў, інертныя растваральнікі і інш.

Газападобныя і вадкія рэчывы. Добра раствараюцца ў арганічных растваральніках, некаторыя ўтвараюць крышталегідраты.

Негаручыя, выбуховабяспечныя, хімічна інертныя. Пры ўльтрафіялетавым апраменьванні ў прысутнасці атамарнага кіслароду разбураюцца з утварэннем радыкалаў, якія дыспрапарцыянуюць да фторкарбанільных злучэнняў, галагенаў і іншых; хлорзмяшчальныя фрэоны (холадагенты) вылучаюць атамарны хлор, які ўзаемадзейнічае з атмасферным азотам.

Малатаксічныя. ГДК (Гранічна дапушчальная канцэнтрацыя) — 1000-3000 мг/м³.

• Хладоны (Фрэоны) // Беларуская энцыклапедыя: У 18 т. Т. 17: Хвінявічы — Шчытні / Рэдкал.: Г. П. Пашкоў і інш. — Мн. : БелЭн, 2003. — Т. 17. — 512 с. — 10 000 экз. — ISBN 985-11-0035-8. — ISBN 985-11-0279-2 (т. 17).