Ктулху

Кту́лху — мітычная пачвара, прыдуманая амэрыканскім пісьменьнікам Говардам Лаўкрафтам. Упершыню ўзгадваецца ў апавяданьні «Покліч Ктулху» у 1928.

Ктулху падобны адначасова на васьмінога (галава), цмока (крылы на сьпіне), чалавека (тулава). Дакладныя памеры невядомыя, але можна меркаваць, што Ктулху дастаткова вялікі, бо адзін з герояў твора назваў яго падобным да «хадзячае гары».

Належыць да роду Старажытных. Ляжыць у сьне, падобным да сьмерці (верагодна, коме) на вяршыні затопленага гораду Р’льех пасярод Ціхага акіяну. Калі зоркі «трапна сыходзяцца», горад паўстае з вады й Ктулху прачынаецца.

Таксама паводле твораў Лаўкрафта, па ўсёй Зямлі існуюць групы культыстаў, якія прыносяць Ктулху чалавечыя ахвяраваньні, шалеюць, таньчаць і ўвесь час чытаюць закляцьце: «Пх’нглуі мглв’нафх Ктулху Р’льех вгах’нагл фхтагн», што прыкладна перакладаецца як «Дома ў Р’льеху мёртвы Ктулху чакае й бачыць сны».

Ктулху здольны ўплываць на чалавечы розум, аднак з-за таго, што Р’льех амаль увесь час знаходзіцца пад вадою, Ктулху можа ўплываць толькі на сны. У «Поклічы Ктулху» сны, якія ён дасылае, даводзяць людзей да вар'яцтва.

Говард Лаўкрафт казаў, што імя Cthulhu варта вымаўляць як Kathooloo ці Khlûl’hloo. Ні ў водным з арыгінальных ангельскіх варыянтаў няма вымаўленьня Cthulhu як Цтулху. Іншыя варыянты напісаньня: Tulu, Clulu, Clooloo, Cighulu, Cathulu, Kutulu, Q’thulu, Ktulu, Kthulhut, Kulhu, Thu Thu Hmong

• «Покліч Ктулху»
• «Жах у Данвічы»
• «Горы вар’яцтва»
• «Шаптун у начы»
• «Цень па-над Інсмутам»

У сеціве Ктулху набыў даволі вялікую папулярнасьць і для яго нават прыдумалі спэцыяльны смайл: {:€ або :-Е або ©€. Стаў героям шматлікіх карыкатураў, коміксаў, жартаў і пародыяў.

Папулярныя выказваньні з удзелам Ктулху: «Ктулху захавае твой моск», «Ктулху фхтагн!», «Ктулху захавае ўсіх».

Ктулху ўзгадваецца ў шэрагу кампазыцыяў (пераважна мэталёвага кірунку):

• Інструмэнтоўка «The Call of Ktulu» гурту «Metallica» (альбом «Ride the Lightning», 1984)
• Песьня «The Thing That Should Not Be» гурту «Metallica» (альбом «Master of Puppets», 1986)
• Песьня «Cthulhu» гурту «Therion» (альбом «Beyond Sanctorum», 1992)
• Песьня «Cthulhu Rising» гурту «Draconian» (альбом «Dark Oceans We Cry», 2002)
• Песьні гурту «Cradle Of Filth» — «Cthulhu Dawn» (альбом «Midian», 2000) і «Mother of abominations» (альбом «Nymphetamine», 2004)
• Песьня «Shakled to the Trilithon of Ktulhu» гурту «Bal-Sagoth»
• Інструмэнтоўка «Rite Of Cthulhu» гурту «Samael»
• Песьня «Дикий койот» гурту «Ляпис Трубецкой» (альбом «Весёлые картинки», 2011)

Ктулху — сховішча мультымэдыйных матэрыялаў