Portugal

Portugal República Portuguesa
(Flaggn) (Woppn)
Amtssproch	Portugiesisch
Haptstod	Lissabon
Stootsform	Parlamentarische Republik
Stootsobahapt	Stootspresident Marcelo Rebelo de Sousa
Ministapresident	Premierminista Luís Montenegro
Fläch	92.212 km² (50. Plotz)
Eihwohnerzoih	10.341.30 (Schätzung 2015)[1]
Bevejkarungsdichtn	112 Eihwohner pro km²
BIP	$20,673 pro Kopf
Hymne	A Portuguesa
Weahrung	Eiro
Zeidzona	WEZ (UTC)
Kfz-Kennzeichn	P
Internet-TLD	.pt
Voawoih	+351

Portugal (amtli: República Portuguesa) is a eiropäischa Stoot im Westn vo da iberischn Hoibinsl. Im Westn und Sidn weads vom Atlantischn Ozean, im Ostn und Noadn vo Spanien begrenzt. Zan portugiesischn Stootsgebiet ghean aa de Insln vo de Azoren und Madeira (mid Porto Santo). Westli vo da Haptstod Lissabon liegt Cabo da Roca, da westlichste Punkt vom europäischn Festland.

Da Nama Portugal kimmt vo da Siedlung Cale im Noadn, wo friahra a wichtiga Hofn wor. Drum ham de Rema, wo Portugal a Tei vom remischn Reich gwen is, Portus Cale dozua gsogt. Do draus is spada Portugal worn, und aus da Siedlung de Stod Porto.

As portugiesische Festland hod vaschiedne Landschoftsforma: im Noadn is eha beagig und grea, do woxn aa de moastn landwiatschoftlichn Gita vom Land. Im Winta kos in de Beag recht koid wern. Noch Sidn hi wead's oiwei flocha, hoaßa und drickana. Do hods nacha eha Baam wia Eukalyptus oda Poimen, und s'kimmt im Summa regelmassi zu Woidbränd. Gonz im Sidn liagt de Algarve, a beliabts Urlaubsgebiet.

Zum Stoot ghean aa no mehrane Insln im Atlantik: d'Azoren und Madeira. Af de Azoren hods aa an greßtn Beag vo gonz Portugal, an Monte Pico (2351 m).

De Eihwohna vo Portugal han insgsomt recht oaheitli, bsundas wann mas mid sein Nochboan Spanien vagleicht. De ollagreßte Meahheit is katholisch und spricht im Oidog portugiesisch, bloß im Noadn hods a poor Deafa wos an asturischn Dialekt ren. Auslända hods a ned so vui im Land (Portugal is ned reich gnua), und de wo do han kumman zum Groußtei eh aus ehemolign Kolonien (Brasilien, Kap Verde, Mosambik oda Angola), han aa katholisch und redn portugiesisch ois Muadasproch.

Heitzdog lem d moastn Portugiesn in da Stod, voa oim on da Gstod. As Hintaland is dogeng ned so dicht bsiedlt. De greßtn Städt (2011) han:

• Lissabon (545.245 Eihwohna)
• Porto (237.559)
• Amadora (175.558)
• Braga (181.819)
• Coimbra (143.052)
• Setúbal (120.791)
• Queluz (107.328)

Seit da Revolution vo 1974 is Portugal a parlamentarische Republik. Da offizieje Schef is da President, wo oi fimf Joar vom Voik direkt gwejd wead. Da President hod a weng mea zan song wia in Deitschland oda in Östareich, zum Beispui is'a da obaste Kommandant vo da Armee. Da Schef vo da Regiarung is owa da Ministapresident, dea wo wiedarum vom President ernennd wead. Dea muass owa mid de Meahheitsvahejtnisse im Parlament zammapassn, des wo da President owa jedazeid aflesn ko.

As Parlament wead oi via Joar im Vahejtniswoihrecht vom Voik gwejd. D'wichtigstn Partein han d'Sozialistn (PS) und d'Sozioidemokratn (PSD) (wobei noch unsare Vahejtnisse de Sozioijistn eha Sozoodemokratn und d'Soziodemokratn eha konservativ/biagali han). Greane und Kommunistn hods aa im Parlament.

Portugal is in fimf Regiona am Festland und zwoa autonome Regiona (Azoren, Madeira) im Atlantik eihteit. D'Regiona han sejbst wieda in 28 Subregiona zalegt. Danem gibts owa aa a Eihteijung in 18 Distrikt, wo mid de Regiona ned gscheid zammapassn. Und neilich homs no a neie Gliedarung mid siem Metropooregiona, zwejf Stodkroas und via Landkroas eigfiaht.

Da portugiesische Portwein is wejdweit bekonnt. S is a Likeawein, wo voa oim zua Nochspeis drunga wead. Duachn Zuasotz vo Branntwein wiad da Gearungsprozess untabrocha und weahnd da Logarung entsteht nacha da charaktaristische Gschmock. De Rebm dafia woxn nua in am kloan Gebiet vom Dourotoi.

Aa ondane Weinsortn ham an guadn Ruaf. De siaße Version vom Vinho da Madeira aus Madeira is a weng wia da spanische Sherry, da Madeirawein is owa in oin Variantn vo trockn bis siaß zan kriang. Im Land sejm wead unta ondam da Vinho Verde („greana Wein“) gean drunga, wo in da Region Minho im Noadn vo Portugal obaut wead.

S Nationoidrangl vo Madeira is da Poncha (Punsch), a Cocktail aus Aguardente und Orangnsoft (mangmoi aa duach ondane Fruchtsoftln, wia Maracujasoft, easetzt). Dazua gibts aa oft Eadniss und/oda eihglegte Fiseln.

• Dietrich Briesemeister, Axel Schönberger (Hrsg.): Portugal heute. Politik, Wirtschaft, Kultur. Vervuert, Frankfurt am Main 1997, ISBN 3-89354-564-6
• Gilberto Freyre: Herrenhaus und Sklavenhütte. Klett-Cotta, Minga 1990, ISBN 3-423-04554-X
• Eckhart Nickel: Gebrauchsanweisung für Portugal. Piper, Minga 2001, ISBN 3-492-27520-6
• Antonio Henrique R. de Oliveira Marques: Geschichte Portugals und des portugiesischen Weltreichs. Kröner, Stuttgart 2001, ISBN 3-520-38501-5
• Henry Thorau (Hrsg.): Portugiesische Literatur. Suhrkamp Verlag, Frankfurt am Main 1997, ISBN 3-518-39270-0

 Wikimedia-Atlas: Portugal – geografische und historische Koartn

 Commons: Portugal – Oibum mit Buidl, Videos und Audiodateien

• cibera - Virtueje Fochbibliothek vo Ibero-Amerika / Spanien / Portugal
• Portuguese Culture, Digitale Bibliothek, Biblioteca Nacional de Portugal

1. ↑ Bevölkerung Portugals. Instituto Nacional de Estatíca, archiviert vom Original [1] am 9. Jenna 2017; abgerufen am 9. Januar 2017 (portugiesisch). 

Stootn in Eiropa

Albanien | Andorra | Bejgien | Bosnien-Herzegowina | Buigarien | Denemark2 | Deitschland | Estland | Finnland | Frankreich2 | Griachaland | Georgien | Holland2 | Irland | Island | Italien2 | Kasachstan1 | Kosovo | Krowozien | Lettland | Liachtnstoa | Litaun | Luxnbuag | Malta | Moldawien | Monaco | Montenegro | Noadmazedonien | Norwegn2 | Östareich | Poin | Portugal2 | Rumänien | Russland1 | San Marino | Schweden | Schweiz | Serbien | Slowakei | Slowenien | Spanien2 | Tiakei1 | Tschechei | Ukraine | Ungarn | Vaoanigts Kinireich (UK)2 | Vatikanstod | Weißrussland 1 Liegt zan gresstn Tei in Asien.  2 Hod aa Gebiete aussahoib vo Eiropa.

Mitgliedsstootn vo da Eiropäischn Union

Bejgien | Buigarien | Denemark | Deitschland | Estland | Finnland | Frankreich | Griachaland | Holland | Irland | Italien | Krowozien | Lettland | Litaun | Luxnbuag | Malta | Östareich | Poin | Portugal | Rumänien | Schweden | Slowakei | Slowenien | Spanien | Tschechei | Ungarn | Zypan

Mitgliedstootn vo da OECD

Australien | Bejgien | Chile | Denemark | Deitschland | Finnland | Frankreich | Griachaland | Irland | Island | Israel | Italien | Japan | Kanada | Luxnbuag | Mexiko | Neiseeland | Holland | Norwegn | Östareich | Poin | Portugal | Schwedn | Schweiz | Sidkorea | Slowakei | Slowenien | Spanien | Tschechei | Tiakei | Ungarn | USA | Vaoanigts Kinireich (UK)