Der Bulle von Tölz: Zirkusluft

Zirkusluft is a deitscha Feansehfuim van Werner Masten ausm Joar 2002 noch on Drahbuach van Andreas Föhr und an Thomas Letocha. Es is de 37. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 2. Oktoba 2002 af Sat.1 ausgstroit worn.

Da reiche Baua Johann Kiening wead dastocha afgfundn. Laut Grichtsmedizina Dr. Robert Sprung hondlt’s si bei da Tatwoffn um a zwoaschneidigs Messa. Es gibt koane Obweahvaletzungan ned; da Täta muass s Opfa ohne Vorwarnung obriffn hom. Affälli is aa, doss da Stichkanoi exakt im rechtn Winke valafft.

De Kriminala Benno Berghammer und Sabrina Lorenz findn glei a poar Peasona mit on mehr oda weniga stoarkn Moardmotiv, vor oin da eawochsne Bua van Kiening, dea wo vo Bruaf „Sohn“ is, dem wo da oide Kiening koa Gejd neamma gem woit. Es gibt aa on finanziell bedrängtn Nochboarn, dem wo da Kiening a millionanschwars Grundsticksgschäft midm Bauuntanehma Anton Rambold vadeam woit. Und schliaßli is do no a kloana Wondazirkus, dem wo da Kiening scho vui Joar a Wintaquartier gem hod, jetzad oba af d’Stroß setzn woit.

Im Zirkus trifft da Benno Berghammer de Dompteurin Madeleine Gartlach. Mid deara hod ea vor 17 Joar a kuaze, oba leidnschoftliche Affär ghobt. Es stejd si außa, doss da oide Kiening seit mehrane Joar mid da Madeleine wos ghobt hod, und jetzad woit eas heiradn. Se hod koa Lust neamma afn Zirkus und woit endli a normals Lem fiahn. Ia 16-jähriga Sohn Leo woar oba kloar gega de Heirad. De Frog, ob da Leo sein zuakinftign Stiafvoda drum umbrocht hod, wead umso pikanta, wia de Madeleine an Kommissar gsteht, doss da Leo sei Sohn is. Dazua kimmt, doss da Spressling wega mehrane oagntumsdelikte af Bewährung is und trotzdem in deara kuazen Zeit, wo da Kommissar eam kennt, an Benno sei Auto fia ra Spritztour heagnumma und mehrane Gejdbeidl gstoin hod, drunta den vo seina Muada Resi. Schliaßli entdeckt da Berghammer an Leo sei bemeakenswerts Darts-Talent und spricht de Madeleine direkt draf o. Se sogt, doss da Leo s Messaweafn van ehemolign Messaweafa Richie gleant hod, dea wo im Zirkus neamma ois soichana aftretn is, seit sei Partnarin duach on Fejwuaf ums Lem kemma is. Da Richie hod des nia ibawundn; se hod si um eam kimmad und ea is wia ra Kind on ia ghängt. Ea hods gfrogt, obs mid eam midgeht, wonn da Zirkus dichtmocht; do hods eam gsogt, doss wegan Benno z Däiz bleim wead.

Da Kommissar woaß jetzad, wia ra an Mearda kriang ko. Ea suacht an Richie af und untasogt eam ob sofort jeglichn Kontakt mid da Madeleine. Aft wui da Richie eam a Messa neihaun, oba da Berghammer hod a Schutzwestn o.

Noch da Vahoftung van Richie wui da Kommissar vo da Madeleine Gartlach wissn, obs eam in Sochan Vodaschoft ned ebbs zun Song hod, wei Sechsmonatskinda doh recht sejtn san. Se gibt zua, doss eam in dem Punkt oglong hod; se häd si hoid so gwinscht, doss ea da Voda van Leo warad.

Gfuimt worn is haptsächli z Däiz;^[1] ois Schaublotz fia de „Pension Resi“ homs as Hollerhaus Irschnhausn heagnumma.

• Zirkusluft in der Internet Movie Database (englisch)Vorlage:IMDb/Wartung/Gleicher IMDb-Kenner in Wikipedia und Wikidata
• Zirkusluft bei Fernsehserien.de

1. ↑ Zirkusluft – derbullevontoelz.de (Memento vom 29. Aprü 2016 im Internet Archive)