Urartuava

Urartuava

Biaineli
Sare	-XI-eafa decemda – -VI-eafa AGJ
Avuxo	Urartu
Avafa pulara
- Hurri-Urartu aveem
Kira
Ord	Griawiyisa ava
Abava	Simbakorafa
Avafa beksa
Iso 639-2
Iso 639-3	xur -
IETF	xur
Tigixo
Tuveli icde Aveem
betara	teza

Urartuava tiyir gazafa ava ke Urartu savsavafo gazaxo koe refa ronefa Turka.

Ava ke Urartu tiyir licedasa ava mepasusa vas Semit veem meiu Indoeuropa vox tisa ke mila gama dam Hurri ava. Gernot Wilhelm ruyer da veyava xantumafa gu Hurri ava isu Urartu, tir evlafa gu III^-eafa decitda AGJ isen solparsara ke toloya ava moni -2000 AGJ sokiyir. Beka Urartu ava me tir wanacka ke kona afoka ke Hurri ava, pune jontika kira tid tikisa. Yastuca pilkovon tir ageltafa gu guazaf Hurri afoka grupena kan yon tolavaf krent. Do konak artan, Igor Dyakonov va tikiks ke Hurri aveem gu kavkazafa ava valentrone ke gola tiaveyer.

Friedrich Eduard Schulz germanaf grupeik va urartuavaf kosuteks koe vema ke Van uzda bak 1826 kosmayar nume va konak simbakoraf kosuteks ksudayar voxe me lasubasbeksayar. Radimi basbeksara va simbakorafa suterinda ke Assur bak 1850^-e sanda, ksudaks ke Schulz di vanpiyid omava ta basbeksara va Urartuava. Aptacik kalion vofayad da ina me tiyir tikisa va kona ava ixam pilkomodayana. Sutera bak 1882 gan Archibald Henry Sayce tere zo basbeksayar. Soe Urartuava kaiki oxam Taneafa Tamavageja bak 1930^-e sanda kan Urartu-Assur tolavaf gazaf kosuteks ke Kelishin is Topzawa gan Johannes Friedrich germanik taneon zo remsuteyer. Ar aneyasik va inyon kobaveks azon tukotrayad. Bak 1963 rossiavaf pulviropak ke Urartuava gan Georgi Melikicvili zo sanegayar.

Wori, godrigdat da grupen krent urartuavon suteyen va abic trogarn is pulviropaf kor malsaved batdume va brutafa grupera va bata ava anton dikit. Suteks tid kosuteks siskes va teginyi ke nafalik, i va loote sayakafi tegi numen ravlemeem tir dem mon 350 olkoy don yon trogarn beituyun gu ara ava. Lo beituyun ravlem tid ke Armenava, mon 70 zaeravlem. Ostik gray ton anton taneaf anulaf ilkom is taneaf ok bareaf kontaf ilkom zo gruped kiren ant bat kor koe kosuteks awid. Inde Gernot Wilhelm bazer, pune Urartuava dere tir ergative ava ( dem lan pulviropaf tod muxas va detce ke mukodaf gray ). Blayakvura gitir ton DMG ( Detce az Mukoda az Gray ) dre.

Ta remsutera va ava, urartuavusik va simbakoraca sutera vey tela warzafa ke Assur. Taneaf grupen gazaf kosuteks abdi tujadiara va simbakoruca kan Akkad zo suteyed. Lo grupen kosuteks kle tid gazaf kosuteks kotgrupes va sayakafa cenera oke tid vegeduks ta winugafa atayera. Abic kuritcaf vapey is kosuteks is kuecaks koe ralma vegeduyuna gazon gu Rusa II ( -680 – -645 AGJ ) zo kosmayad.

Sutesik ke Urartu va abica sutewa, i va biwe decemoya. Bata sutewa benelon tiyid dem mamopafa voda ( mamsutewa ) tcalasa va asanka. Tuelimatason va sugdala ke lanyon trogarn, rasutewa ( ravlem bazes va ra ) dere zo malsaveyed. Urartuavusik va toloya suterinda kan zovdana sutewa faveyed : i va bata exaksunon koswayana gu fumsutewa ke Hatti malsaveyena ta remsutera ke Luvi sane tici voltoleafa decitda. Ina koe Altıntepe poke gola ke Luvi zo trasiyir isen ant grupena sutewa kene ak trasiyid ise va ceke ape bazeyed. Bana fumsutewinda nope toloy trelaf kosuteks zo gruper, i nope tanoy moe vapey male Rusahinili is toleaf kene iyekotafa pozla tisa ke megrupena xanta is mea basksevayana.

Teza:Savsavaf aveem

	Urartu : savsugalafo gazaxo ke Pokefa Lenteka
Gazik	Arame • Lutipri • Sarduri I • Ishpuini • Menua • Argishti I • Sarduri II • Rusa I • Argishti II • Rusa II • Sarduri III • Sarduri IV • Erimena • Rusa III • Rusa IV
Debak	Altıntepe • Argishtikhinili • Arzashkun • Ayanis • Bastam • Erebuni • Rusahinili • Sardurihinili • Teishebani • Tushpa
Lorik	Arubani • Haldi • Huba • Shivini • Teisheba • Tushpuea
Araya	Urartuava • Alka • Yamba