Levrotira va Plassans (suterot)

Levrotira va Plassans tir berpot ke Émile Zola sanegayan bak 1874, i balemeafa karba ke Rougon-Macquart yasa nevatum.

Darekeon yotepes va Napoléon III tuke gaderopafa skujera ke Rougon yasa, Plassans widava gan mwedevik re zo stujer. Faujas gertikye tir bonapartevafe kou Besançon do gadikya zo stakser, latrovgatason va niedara num jupatason da widava va mwedevafa neya digin denfitir. Gan Mouret yasa taneon zo jander. Bata yasa tir dem François Mouret tis balem-sandaf ( nazbeikye ke Ursule Macquart ) is savsaf kazik, is Marthe Rougon kurenya is nazbeikeem : Octave is Serge is Désirée. François Mouret tiyir parloesik is kazasik va vor kor Marseille. Bata yasama va kalafa is vumeltafa blira koe Plassans widavama tiskir. Vuida ke gertik tir ringafa : gire levrotira va Plassans. Batcoba droon gu ilvegedura va Mouret yasa fu dilizer. Faujas gertik va swava ke Marthe Rougon taneon koilkar, gukoeson va « abidarsaf » pak ke bata ayikya. Va redura va tcema pomasa va yikya mea folixesa puon tiaver, i va tcema yoltkirafa gu « Grabom ke Ketikya ». Marthe den alkafa is cugafa jabudeva fu pastawer, kali oviskuca, nume va konoleks ke yasafa bunga fugin gepoytesir. François Mouret gu bat abdumimaks mali toza zo divpakuder

François Mouret va atrira ke rostela is iltaal gibedisuker, nutison aulaf. Mea dadison va rictela koe intafo yasaxo, François koe tubemuasa apulvuca gelber ise koe bazaxo va int loviele kobuder. Tere koe Tulettes oviskikxo voleron zo kobuder lize Adelaïde Fouque veygadya ixam tigir. In toz tudagawer. Nope auzura ke Antoine Macquart ziavye is Marthe kurenya ins gufenkunasa va tuvel ke mawa, laxuyotcer. Denlanir aze kosmar da matela al zo alkejar ise al zo vilar. Inafa ova gin yolkar nume va mona teyar. Anteyanon xonuker, keni Faujas gertik is inafa gadikya. Marthe kurenya nope kotcakola milsielon mulufter radimida konaktandon mejeyer.

Levrotira va Plassans va watsa ke oviskuca rueper, i ke bunga veyzilina dene yasa darpe oxileem. Dere is dalon rabatet da gertikeem tir dofugaf gu roti viwazeni gan Faujas gertik elvarsaf gu jupekara don savera va opelkuca ke nobasikeem, i ke pilkovon ayikya. Ujaroti kake nwada folixa va aryona logaderopafa erava zaniyir. Bata neva, dem tey is teyka, va dwesa wira va gaderopa is alka isti bata 19^-eafa decemda firvir.

Nazbeikya ke Pierre Rougon isu Félicité, bata balemsandik nutir aulaf. Tir kurenik ke François Mouret kosayikye ise vektapar. Gadik ke baroy nazbeik, va aulafa mona keve Banne vawila koe Plassans vugviele bulur lize va vielcek tiskir, gadeson va guyundera ke ebava is asadason is trumason da Désirée nazbeya tisa san-balemdafa vox swavon alubdafa me fitulur. Inafa aulafa vox brigafa blira gan kofira ke Faujas gertik va mona di zo romplekur.

Bat « oretlikap kuftanon divgabeyen » tir gertik. François Mouret va toloya olkoba ke toleaf vegem ke intafa mona puon lizukedar. Faujas gertik mal Besançon artlapir isen metan va betcoba icde in gruper. Voxen orikafu nisu icde bat alkik dem spuntenaf trendig is figaf baskeem va Plassans fure koefid. Gu skaltafa arienta co zo belcekar, i gu arienta meviele pintana vox gruyetena viele Trouche ikaberikye ke gertik dene mona ke Mouret va int koaykar : kore Trouche va Faujas kivar, punesoe icde in umote gruper nume me zo rodivplatir.

Enwe Faujas tir skujesik is bitonik firviyis va zana pu Eugène Rougon eldik. Ganon al zo vajger enide va Félicité gadikya ta levrotira va Plassans bal direfa libura di pomar. Batdume bate granikye dem « figafa oria ke sayakik » va Mouret lansielon denlanir. Koirubar aze va widava toz levrotir enide lajupar da retik zobes va gindaroti va libura watar.

Bat san-balemdaf kazik buluyus va ebura kaiki tufa, koe aulafa mona ke Plassans keve Balande vawila irubar lize ton vadulaf evayik va yasa gazar. Va Marthe kosayikya vektapasa al kurer. Albar da kwafa vura gazar, dile pudamadar, va auluca jugemer. Tir grolaptaf gu begard rizoas va blira ke modes widot, voxen me roklet : « In tiyir vepokaf gu ovara nekev laviuca ke buluyus kazik ; moekote tiyir frekiraf is malyeson ronkaf jupas da va malyafa ewa vanmiae begardura ke winka loviele grutrasiyir. » Nekev iedara dile portafa, va takra ke sintaik dir : « Mouret me tiyir ikoraf. » Ile gaderopafa skujera ke widam zavzar, kore inaf yolt gu sokasaneevik zo gesiar. Tuke fre, va gertik ilikatcur, wori va toloya olkoba ke toleaf vegem pu Faujas gertik is inafa gadikya lizukedar.

Gadikya ke Faujas gertik tir ayik mon alub-san-alubdaf dis va « lujorafa gexata ke tawadayikya », is dem fliotaf is figaf vageeem, ise tir rictulokik sontes va tanoye detce : nazbeye. Vanpir inaf zanisik ise wendeson cwar. Kotviele va yalgafa ilava lize Ovide kenibeter egar, kore va ilavaja malnaleter, pune abidon askir.

Mu nazbeye va kotcoba co askir ise kalveger : va cenkaxa gu Rose taneon soltiolter, vanpison odiaxik ; ombuson do Mouret, va jontik sielcek tiskir, ise jupar da nazbeye va Marthe robritsar ; va olkoba dace suer lize nazbeye is Marthe tid antafe ta nendoyera va kasafa rezatcara. Va elakera va mona is viafa levrotira va xo tegison paker. Voxon inafa gadikyafa fema mu Olympe nazbeya torigina gu vodiskik me yarter.

Bat persandik tir gadikya ke Marthe Mouret is kurenya ke Pierre Rougon. Int is kurenye al jupad da Plassans den neya ke Gindaroti bal kevsokara ke santoleaksat ke 1851 zo pastayar ; bata bifa koe taneafa karba ke Rougon-Macquart nevatum zo pwadeyed. Male intafo kusafo kapaxo, va Plassans kare triosura ke Eugène nazbeye tise eldik koe Paris gazar. Ironokafa libura va gazevaf krinanik gu Plassans al zilir, i va Lagrifoul biptik. Batvielu Félicité gu tegira levrotitisa va widava gan Eugène zo vajger. Ine va Faujas gertik ko Plassans stakser isen Félicité gonyaper ise tixolon gopomar. To int koe izga va linulara is ask ta levrotira va modasa widava pu in dukalir. Ostik Félicité va bata evartaca ta divpakudera va François Mouret ilkadene arnazbeikye impavantar kire tulon uculer da bantel co tir sokasaneevik. Ine tir deksafe nume meviele volunt tegir numaze va mukot artfir viele warzafa libura di zo war.

Dem omzakiraf lesay is mazdafa berga is talgiskaf art, ine tir kurenik ke berikya ke Faujas gertik. Nekev tcakera ke arnazbeye vliguse is beomase, va Plassans artlapir. Gertik va bat tervas vuwik gokorundar nume jupar da ine vanpir patopik ke alkaf kizey. Afizon, Trouche va aulafa siva ke rupiskaf unenik gifintar voxe mielon koe zazdaja ke Plassans gibedulir. Ostik, va velikya vefasa kabdue bazaxo gikaikdisuker ise va fage pu sardikya progetenon gifirvir. Tir voctik is faigoyaf kapusik. Faujas gertik tire co djumilstakser voxe me rojupar kiren mantode Trouche va inaf skaltaf darekeugal co razdar. Va zobera va gaderopaf tawuk ke gertik levtegir voxe inaf antaf mukot tir estura va Mouret ebava. Lajutceder : koe ilava ke digisik ke mona tere keniber voxe tison grijarsaf gan tenafa firdera va mona va ine zo xonukesir.

Berikya ke Faujas gertik gan gadya zo ilkader ise gan berye zo vligur. Gu Plassans va int koaykar ise va mona ke Mouret levirubar aze adre kodigir. Tir vungafa is delfajafa ise va jontika linularaja ke kurenik vol nyurnar. Va titfira ke François Mouret tegison paker, galbuson va krizafa nisura icde in. Viele bantel zo koropexer, pune va Marthe nuboker nume va jugemeks seotar, i va tulon erba. Olympe va mona guiner aze tison grijafa koe ilava ke aloyayan digisikeem, nope firdera ke Mouret xonukeson zo akoyer.

In tir webdik is tozekik. Bat mialaberikye ke Pierre Rougon belcon tir ziavik ke Marthe is François Mouret. Koe tawadayaf indam poke Tulettes oviskikxe ezeon blir, lize gadikya zo kobudeyer. In vanmiae centaxo is libol diliodon nublir, voxen batcoba anton tir laviaca : inafa atelatorafa kicera va patavasa tuwava palser. Kota inafa agralaca va mikot sodikir : dulapon sotegir. Va bogararsa pu Félicité is Pierre Rougon siofar nume dasatason, kadimi auzura ke Marthe, va François div oviskikxe djukuyatesir. Macquart al rabater da bantel tire re tir oviskaf is dace tizaf. Dofugon gu Alexandre susik is kumzilira ke Fénil gertik tis volnarsik ke Faujas, tunuyar inde bantel va intafa mona di anteyar nume va Faujas is inyon yasik di xonukesir. Macquart tir askisik va bata piza, kevitsatason va Rougon.

Kwikya ke Mouret vol tir viwazesik va sintaaf zanisik suves va yasa : volson, va fituluca is takraroduca viwazer. Darpe bueem ke berpot, ikoron dun tcekar, jalaruson kare rupa. Bata guazafa abidikya va denfira ke Faujas taneon roton torigir voxaze va deweldura ke Marthe permur. Batvielu va Mouret dun malyopar ise kugdar nume va inafa rantafa milbava tere tuwidlar aze va relkafa kapsa icde mekalik koe Plassans galbur. Tir ke tum stakseyes va bate kimtikye ko Tulettes oviskikxe. Batvielu va mona gazar, pakason va roti do Faujas W-ya is Olympe. Teni berpot, tove Marthe vol luntur kore bantelya dimfrekirawer voxe ilblir. Gan Rose gu culimera is bonura is ikorura zo kaikanzar.

• Émile Zola : Francavaf francaf suterotik ( 1840-1902 )
• (fr) Levrotira va Plassans, dene Wikisource ( xantokrent )

t · p · b Rougon-Macquart yasa, nevatum ke Zola
Les Rougon-Macquart, Histoire naturelle et sociale d'une famille sous le Second Empire ( Rougon-Macquart yasa, Tuwavafa is seltafa izva ke lana yasa bak Toleaf Gindugal )
1870-e sanda	La Fortune des Rougon ( Tufa ke Rougon yasa ) • La Curée ( Guinera ) • Le Ventre de Paris ( Jivot ke Paris ) • La Conquête de Plassans ( Levrotira va Plassans ) • La Faute de l'abbé Mouret ( Derka ke Mouret gertikye ) • Son Excellence Eugène Rougon ( Eugène Rougon tabexik ) • L'Assommoir ( Sagondexo )
1880-e sanda	Une page d'amour ( Lanu bu ke rena ) • Nana ( Nana ) • Pot-Bouille ( Pot-bouille ) • Au Bonheur des Dames ( Kalaxe ke weltikya ) • La Joie de vivre ( Blisa daava ) • Germinal ( Germinal ) • L'Œuvre ( An grot ) • La Terre ( Tawa ) • Le Rêve ( Klokaks )
1890-e sanda	La Bête humaine ( Ayasulemya ) • L'Argent ( Erba ) • La Débâcle ( Atitsura ) • Le Docteur Pascal ( Pascal kurmikye )