Щуго

Щу́го – ункъидаги анлIидаги гьоркьоб бугеб натуралияб рикIкIен. БатIияб куцалъ – щу́билаб (≈ гIур. пятёрка).

Авараб щу́го абураб рагIи бачIана протокавказияб *f_ɦä̆ абураб кьолбодасан. Гьелдасанго лIугьана протогIандияб *ʔin-š:-tu- «щуго», гьелъа кьуна гIанд. иншду-го, гIахьв. инщту-да-, чIам. инссуда, тIинд. инщту-я-, кIкIаратI. инщту-да, болъихъ. ишту-да, багул. иншту-ра, гъодоб. инщту-да. ПротогIандияб *ʔinš:tu- «щуго» ккола *ʔinƛ:i- «анлIго» кьолбохъегогIадин гьабураб *š:i-du- (*-du- суффиксгун) абураб кьибил, бичIчIизабулеб буго С. Старостиница. Аваргун-гIанди кьалбазе гIагар ккола добго протокавказияб кьолболIан рачIарал цIунтI., гьинух., хварш. лъено, инхоквар. лъыно, бежтI. лъина, гьунз. лъино, цинги чачан., гIалгI. pχiʔ, бацб. pχi «щуго», цинги лаказул ххул- «щуго», дарг. гIахъуш. шел, чирахъ. хьу-ял, цинги протолезг. *лълъве- > лезг. вад, табас. хьуб, агъул. гIафуд, рутул. хьуд, цIахур. хьоллаь, крызазул фыд, будух. фыд, рочисезул лълъо, лълъвейтIу, удиязул хъIо, цинги хинал. пхьу, цингиги протомагърибкавказияб *s-xʷǝ.