اليساريه Left-wing politics مصطلح سياسى بيعبر عن تيار فكرى و سياسى بيبتدى من الليبراليه بفروعها المختلفه خصوصا الليبراليه اشتراكيه و منها للاشتراكيه بفروعها المختلفه زى الاشتراكيه ديموقراطيه و توصل للتيارات اللى بتتسمى اقصى الشمال زى الشيوعيه و الاناركيه, . اصل الموضوع بدا مع الثوره الفرنساويه وقتها كان فى البرلمان الفرنسى رجال الدين و النبلا الارستقراطيين كانو بيعدوا على يمين الملك لويس الستاشر و النواب الليبراليين اللى بيمثلوا الشعب و اللى بيدفعوا عن حقوقه بيقعدوا على الشمال (اليسار), وقتها حصل اضرابات و مطالبات من النواب الليبراليين اللى اعلنوا انهم الممثلين الحقيقيين للشعب و انهم الاعضاء اللى الشعب انتخبهم و قتها بدئت الاحداث اللى اتعرفت باسم الثوره الفرنساويه.مصطلح اليساريه اتغير كتير من اول ما ظهر فى فرنسا عشان يوصف التيار المعارض لالاريستقراطيه و تدخل رجال الدين فى السياسه و تحكمهم فى الناس, دلوقتى مفيش تعريف الكل متفق عليه يوضح مين اللى بيتوصف باليسارى او اليمينى, بس بيتوصف بيه دلوقتى الليبراللين بمدارسها الكتيره و الاشتراكيين و ممكن الشيوعيين و الاناركيه بس ساعات اليساريين بيرفضوا ضم الشيوعيين ليهم عشان نظامهم الشمولى و تحكمهم فى كل حاجه و للاناركيين عشان شايفينهم فوضاويين.
الحكومه لازم تبقى علمانيه و ما تفرقش او تنحاز فى صف دين من اديان المواطنين بتوعها, تعامل المواطنين بنفس الطريقه باختلاف دينهم. (متفق عليها من كل جهات الشمال السياسى و العلمانيه)
الانتماء للمجتمع و للبلد اللى انت فيها.
التطور و التغير مع الزمن و الوقت حسب اللى بيحصل فى العلم و الدنيا و منفضلش متمسكيين بالقديم و باللى كانو بيعملوه زمان. (من افكار الليبراليه)
ان القانون هو اللى بيحدد ثقافه و الحدود اللى المجتمع ماشى بيها و بيعتمدش على تقاليد المجتمع فى تنفيذ الاحكام. (من افكار الليبراليه)
اليساريه بتحاول تجيب حقها بالدبلوماسيه و السياسه بعكس اليمين اللى ساعات بيشجع الحل العسكرى و العنف عشان ينفذ اللى عايزه.(من افكار الليبراليه و مدارس من الاشتراكيه)
