تاݣورا

تاݣورا هيّا لعبة أمازيغية قديمة كتشبه ل لهوكي، كاينة سيرتو ف لمغريب، دزاير، ليبيا ؤ عند تّوارݣ ف صّحرا لكبيرة، ؤ ف لقديم كانت حتا ف تونس.^[1] كاينين أتار كتدل بلّي هاد لّعبة عندها ؤصول قديمة بزاف، سيرتو ب عتيبار لنتيشار لجغرافي لكبير ديالها.^[2]

حاليان تاݣورا مهددة ب نّديتار بحال بزاف د تّقاليد لأمازيغية لقديمة، ؤ كتّلعب غير ف مناطق محدودة.^[3]

سّمية د تاݣورا مركبة من جوج طروفا: تاݣ، بمعنى ضرب، ؤ ؤرا بمعنى عصا معوجة.^[4] هاد سّمية كانت سيرتو مستعملة ف تازناخت حدا وارزازات. ف بلايص خرين ف لمغريب ؤ ف شمال إفريقيا، كاينين سميّات خرين مستعملين، بحال تاقورا ؤلا تاقوراشت ؤلا تاكورت ؤلا تاورشت ؤلا هاكورث، ؤ عند تّوارݣ هامكشاخ ؤلا أمكشاخ.

تاݣورا كتّلعب ب جوج فراقي مكون كول واحد فيهم من 5 تال 10 د لّعّابا يقدرو يكونو عيالات ؤلا رجال، كيكونو عادتن لابسين لباس خاص ؤ دايرين حزمة علا لوسط ب لون كيمتل كولا فرقة. كولا فرقة كيكون عندها ݣون كيتسما أينين معلّم ب جوج حجرات كبار، ؤ لمسافة بيناتهم تقريبا 4 ميترو، كتقدّر ب 3 د لخطوات كبار. كولا ݣون كيكون شادّو حاريس كيتسما أماضيف، ؤ لحاكام د لماتش كيتسما أنفراي. لانفراي كيعلن علا لبدية د لماتش ف وسط تّيران، فاش كيرمي لكورة (تاكورت) ف سّما، ؤ كيبداو لّعابا ديال لفراقي بجوج كيحاولو يسجلو علا لفرقة لوخرة ب ستيعمال لعصي تاغريفت ديالهم. ملي كيتسجل بيت، لانفراي كيعلن أسوي أسوي (أسوي = بيت).^[5]

وخا تاݣورا كيلعبوها عادة يا رجال بيناتهم يا نّسا بيناتهم، شي مرات كيقدو يلعبوها فراقي ديال رجال ؤ عيالات مخلطين ؤلا فرقة د رّجال ضد فرقة د نّسا.^[4] ف لقديم كانو نّاس كيلعبوها حتا علا ضهر لعودانات.^[3][5]

تاكورت (كورة) باش كتّلعب تاݣورا كتكون مصاوبة من صّوف، عسف نّخل ؤلا لخشب، ؤ مغلفة مزيان ب طرف د جّلد ديال بݣرة ؤلا تور. لكورة باش كيلعبو رّجال كتكون عادة تقل من لّي كيلعبو بيها نّسا. لّعبة شّي مرات كتكون خطيرة ؤ كيقدرو يوقعو فيها إصابات.

وخا داكشي لقواعيد ديال لّعبة كيقدرو يتبدّلو ف تّفاصيل ديالهوم من منطقة ل منطقة، ؤ ماشي ساهل نديرو تعميم علا طّرقان د لّعب ف لبلايص كاملين.^[1]

ف سوس، هاد لّعبة كتّلعب ف لأعياد ؤ لمواسم، سيرتو ف فصل رّبيع، ب ستيعمال عصا من جريد نّخل كتسما تاغريفت، ؤ كورة مصاوبة من صّوف ؤ عسف نّخل.^[3] ف أݣودال ف لأطلس لكبير، لّعبة كتسما أوجّا بمعنى ختي ، ؤ كيلعبوها جوج فراقي من نفس لفيلاج لّي ماعندهومش صراع بيناتهوم. ف بلايص خرين ف لأطلس لكبير، ف سوس، ؤ ف لجنوب، كتقدر تكون فرقة د لمجوجين ضد لعزوبيين.^[1]

من غير ف رّبيع، حتا ف فترات لجفاف، كانت هاد لّعبة كتدار كا طقس ديال طليب شّتا. ف تاجݣالت حدا مراكش، كيلعبوها ف إطار هاد طّقس غير لعيالات بيناتهم، مي ف بلايص خرين كيلعبوها رّجال ضد نّسا. عند آيت واراين ؤ قبيلة تسول، كيتجمعو بعض لعيالات بيناتهوم ؤ كيمشيو ل بلاصة مايقدر يشوفهوم فيها حتا حد من رّجال، باش يلعبو تاݣورا عريانات.^[1]

ف لأوراس كيبداو رّجال يلعبو تاݣورا ف 15 فبراير ف تّقويم ليولياني، مي دّراري صُّغار يقدرو يلعبوها ف أي وقت. ف لفيلاج د تاݣوست كيلعب نص لفيلاج معا نّص لاخور. ف آيت فراح كتكون لّعبة موناسبة ل تصفية صراعات قديمة. ؤ ف مناع كتكون فرقة ديال لمجوجين ضد لعزوبيين.^[1]

ف لقبايل كتسما هاد لّعبة تاغولالت، ؤلا داباغ، ؤلا أشفار. لكورة عادتن بحال ف لمغريب كتكون مصاوبة من صوف، لخشب ؤ جّلد ديال تور ديال لؤضحية د رّبيع. مي تقدر تكون مصاوبة من لمعدن، ؤ ف هاد لحالة كتسما تاخنشت.^[1]

تاݣورا ماكانتش غير لعبة د تّرفيه، مي عندها أدوار جتيماعية موهيمة، بلخصوص لمصالحة ما بين أفراد ؤلا قبايل مخاصمين. ؤ كانت كتّلعب علا بزاف د لماتشات ما بين لأطراف لمخاصمين حتا يتحيدو لحازازات بيناتهم ؤ يتصالحو، عادة 3 يام ب نّسبة ل رّجال، ؤ سيمانة ب نّسبة ل لعيالات.^[3][5]

ف لقديم كانت تاݣورا مرتابطة ف لغالب ب طقوس وتنية ديال طليب شّتا ؤ لخصوبة، سيرتو طقس ديال عروسة شتا، ؤ لعيبادة د لإلاهة تانيت.^[1] هاد تأتير رّوحاني ستامر ف لفترة لإسلامية، بحيت باقي ف بزاف د لمناطق كيتّلعب سيرتو من طرف طّلبة (لّي كيدرسو دّين)، ؤلا علّاقل ضاروري يكونو طُلبة طرف من لّعبة.